Mvus éyoñe Yésus a nga yené be minlôman, Pierre a nga tyi’i na a ke yobe kos e Mañe ya Galilée. Thomas, Jacques, Jean a beyé’é befe be nga tôñe nye. Be nga yob ngumba alu, te bi jôm éziñ.

Tyé pkwa, be nga yene môt éziñ a tele mfôm ôsôé. Ane a nga loone be a tele kindik, a jô’ô na: ‘Ye mia te bi jôm éziñ?’ Nde be nga jô nye na: “Momo!” Ane a nga jô be na: “Yaan avot mbo nnôme ya éfunga.” Éyoñe be nga bo nalé, kos é nga jaé avot ne lut aval é mbe na, be nji be ngule ya dutu de. Jean a nga su’ulane yeme na môt ate a ne Yésus, nde a nga jô na: “Tate le!” Awolo ete ebien, Pierre a nga ku ôsôé, a jok, akekui kindik. Beyé’é bevok be nga tôñe nye be bete éfunga.

Éyoñe be nga kui kindik, be nga yene belet a kos bi bôô ma’a me nduane yôp. Ane Yésus a nga jô be na, be zuu kos be nga yop asu na be kô’ôlane bidi. Nde a nga jô be na: ‘Za’ané diané.’

 Éyoñe be maneya di, Yésus a nga sili Pierre na: ‘Ye wo nye’e ma a lôte ésaé ñyobane kos? Pierre na: ‘Yaa a Tat, womien wo yeme na ma nye’e wo.’ Ane Yésus a nga jô nye na: ‘Ba’ale’e mintômba miam.’ Yésus a nga beta nye sili na: ‘A Pierre, ye wo nye’e fo’o ma?’ Pierre na: ‘A Tat, wo kôme yeme na ma nye’e wo.’ Yésus a nga jô nye na: “Ba’ale’e bone mintômba miam.” Yésus a nga beta sili nye nsili ôte éyoñe lale. Ane Pierre a nga wô’ô ôlun. Nde a nga jô Yésus na: ‘A Tat, wo yeme mam mese. Womien wo yem abim avé ma nye’e wo.’ Ane Yésus a nga jô nye na: “Ba’ale’e bone mintômba miam.” A nga beta jô nye na: “Kele’ ôsu a tôñe ma.”