Ha mashimbu amwe muze Yesu te hasoloka kulu kuli apostolo, Petulu yaya ni kuta yishi ku Kalunga-lwiji wa Ngalileya. Tomase, Tiangu, Yoano ni tumbaji akwo yaya hamwe nenyi. Ayo yatela yishi ha ufuku weswe, alioze kakakwachile niumwe.

Ha mandemba, ayo yamona lunga kanamana kusesa lia kalunga-lwiji. Lunga wacho yaasanyika ni kwamba ngwenyi: ‘Shina hinwakwata kama yishi?’ Ayo yamulweza ngwo: ‘Ka!’ Yaamba ngwenyi: “Telenu wanda ha sali lia chindume lia ulungu.” Muze achilingile, wanda yiuzala too ni yishi nawa kakahashile kwaambata eswe. Hazehene, Yoano yanyingika ngwenyi, lunga wacho te Yesu, chocho yamba ngwenyi: ‘Yono kumana Mwene!’ Kawashi-washi, Petulu yatumbukila mu meya nawa yaya kuli iye. Tumbaji akwo no yamukaula ni wato.

 Muze ahetele ku sesa, ayo yamona mbolo ni yishi aze te ali ha jiko. Yesu yaalweza anehe amwe yishi waze akwachile hanga awezele ha kulia chacho. Mba yaamba ngwenyi: ‘Tweyenu hanga tulie.’

Muze ahwishile kulia, Yesu yahula Petulu ngwenyi: ‘Shina wakunguzanga kuhiana kutela yishi?’ Petulu yamba ngwenyi: ‘Ewa, Mwene, yena unanyingika ngwe nakukuzanga.’ Yesu yamwamba ngwenyi: ‘Lisa mapanga jami.’ Yesu yamuhula nawa ngwenyi: ‘Petulu, shina wakunguzanga?’ Petulu yamba ngwenyi: ‘Mwene, yena unanyingika ngwe nakukuzanga.’ Yesu yamwamba ngwenyi: “Funga mapanga jami.” Yesu yamuhula kamuchitatu. Petulu yevwa chinyengo. Yamba ngwenyi: ‘Mwene, yena unanyingika yuma yeswe. Unanyingika ngwe nakukuzanga.’ Yesu yamwamba nawa ngwenyi: “Lisa mapanga jami.” Chocho yalweza Petulu ngwenyi: ‘Nunga ni kungukaula.’