En pe letan apre ki Zezi ti’n aparet avek son bann zapot, Pyer ti deside pour al lapes dan Lanmer Galile. Toma, Zak, Zan ek lezot disip ti al avek li. Zot ti lapes tou lannwit me zot pa ti ganny nanryen.

Son lannmen granmaten, zot ti vwar en zonm pe debout lo lans. I ti demann zot: ‘Zot in atrap pwason?’ Zot ti dir li: “Non!” Sa zonm ti dir: “Zet zot lasenn lo kote drwat kannot.” Ler zot ti fer sa, zot lasenn ti telman plen avek pwason ki zot pa ti kapab redi li dan kannot. En sel kou, Zan ti realize ki sa zonm ti Zezi e i ti dir: “Senyer sa!” Deswit Pyer ti sot dan delo e naze ziska lo lans. Lezot disip ti swiv dan bato.

Ler zot ti ariv lo lans, zot ti vwar dipen ek pwason lo dife. Zezi ti dir zot anmenn ankor detrwa pwason e azout avek sa ki ti deza annan. Apre i ti dir: “Vin pran brekfas.”

 Apre ki zot ti’n fini pran brekfas, Zezi ti demann Pyer: ‘Eski ou kontan mwan plis ki lapes?’ Pyer ti reponn li: “Wi Senyer, ou konnen mon kontan ou.” Zezi ti dir: ‘Alor, donn manze mon bann pti mouton.’ Zezi ti demann li ankor: ‘Pyer, eski ou kontan mwan?’ Pyer ti reponn: “Senyer, ou konnen mon kontan ou.” I ti dir li: “Pran swen avek mon bann pti mouton.” Zezi ti demann li en trwazyenm fwa. Pyer ti vreman tris, alor i ti dir: “Senyer ou konn tou keksoz, ou konnen ki mon kontan ou.” Zezi ti dir li: “Donn manze mon bann pti mouton.” Apre i ti dir Pyer: “Kontinyen swiv mwan.”