Tabeua te tai imwini kaotin Iesu nakoia abotoro, ao e a baireia Betero bwa e na nako n akawa n Namani Kariraia. A iria Toma, Iakobo, Ioane, ao tabeman riki taan rimwin Iesu. A kangaina n akawa ma akea konaia.

Ngke e a karangaina, ao a nora temanna te mwaane n tei i aon te bike. E takarua nakoia ao e taku: ‘Iai konami te ika?’ A taku: “Akea!” E taku teuarei: “Kabwakaa te karaun i angaatain te booti.” Ngke a karaoia, ao e a onrake te karaun n iika aika bati ao a aikoa kona n atikia ni katokaa. E waekoa n ataia Ioane ae bon Iesu te mwaane arei ao e taku: “Bon te Uea!” E aki tabwara Betero ma e a kibanako naba ao e uaua ni waerake. A rimwi taan rimwin Iesu ake tabeman n te booti.

Ngke a a roko i aon te bike, ao a a nora te kariki ao te ika aika toka  i aon te ai. E tuangia Iesu bwa a na uotii konaia tabeua bwa e aonga ni bati riki te amwarake. Ao e taku: “Nakomai kaingabong.”

Ngke a a tia ni kaingabong, ao e titirakina Betero Iesu ni kangai: ‘Ko tangirai riki nakon te akawa?’ E taku Betero: “Eng te Uea, ko ataia bwa I tatangiriko.” E taku Iesu: ‘Ao kaamwarakeia au tiibu aika ataei.’ E a manga titiraki riki Iesu: ‘Betero, ko tangirai?’ E taku Betero: ‘Te Uea, ko ataia bwa I tatangiriko.’ E taku Iesu: “Kawakinia au tiibu aika uarereke.” E a manga titiraki riki Iesu n te katenua n tai, ao e a rangi n nanokawaki Betero. E taku: ‘Te Uea, ko atai bwaai ni kabane, ko ataia bwa I bon tatangiriko.’ E taku Iesu: “Kaamwarakeia au tiibu aika uarereke.” Imwina, e tuanga Betero ni kangai: “Teimatoa n rimwiu.”