Hĩndĩ ĩmwe thutha wa Jesu kuumĩrĩra atũmwo ake, Petero nĩ aatuire itua rĩa gũcokerera wĩra wa gũtega thamaki Iria-inĩ rĩa Galili. Toma, Jakubu, Johana, na arutwo angĩ nĩ maathiire hamwe nake. Maategire thamaki ũtukũ wothe no gũtirĩ kĩndũ maanyitire.

Mũthenya ũyũ ũngĩ rũcinĩ tene, nĩ monire mũndũ arũgamĩte rũteere-inĩ rwa iria. Aamoririe ũũ aanĩrĩire: ‘Harĩ kĩndũ mũnyitĩte?’ Nao makĩmũcokeria: “Aca!” Mũndũ ũcio akĩmeera: “Ikiai neti mwena wa ũrĩo wa gatarũ na nĩ mũkũnyita kĩndũ.” Rĩrĩa maaikirie neti, yaiyũrire thamaki nginya makĩremwo nĩ kũmĩgucia. O rĩmwe Johana nĩ aamenyire atĩ mũndũ ũcio aarĩ Jesu na akiuga ũũ: “Nĩ Mwathani!” Petero nĩ oimire gatarũ-inĩ o hĩndĩ ĩyo, akĩrũga maĩ-inĩ, na agĩĩthambĩra erekeire rũteere-inĩ rwa iria. Nao arutwo acio angĩ makĩmũrũmĩrĩra marĩ gatarũ-inĩ.

Rĩrĩa maakinyire rũteere-inĩ, maakorire mũgate na thamaki  ikĩhĩhio. Jesu aameerire mamũtwarĩre thamaki imwe iria maanyitĩte nĩguo mongerere harĩ icio ciahĩaga. Aacokire akĩmeera: ‘Ũkai mwĩgagũre.’

Maarĩkia kũrĩa, Jesu nĩ oririe Petero ũũ: ‘Nĩ ũnyendete gũkĩra ũrĩa wendete gũtega thamaki?’ Petero akĩmwĩra: ‘Ĩni, Mwathani, wee nĩ ũĩ nĩ ngwendete.’ Jesu akĩmwĩra: ‘Kĩheage tũgondu twakwa gĩa kũrĩa.’ Jesu nĩ aamũũririe ũũ o rĩngĩ: ‘Petero, nĩ ũnyendete?’ Nake Petero akĩmwĩra: ‘Mwathani, wee nĩ ũĩ nĩ ngwendete.’ Jesu akĩmwĩra: “Rĩithagia tũgondu twakwa.” Jesu nĩ aacokire akĩmũũria riita rĩa gatatũ. Petero nĩ aarakarire mũno. Aacokire akĩra Jesu ũũ: ‘Mwathani, nĩ ũĩ maũndũ mothe. Nĩ ũĩ nĩ ngwendete.’ Nake Jesu akĩmwĩra: “Heaga tũgondu twakwa gĩa kũrĩa.” Agĩcoka akĩmwĩra ũũ: “Thiĩ na mbere kũnũmĩrĩra.”