មេរៀនទី៩២
លោកយេស៊ូលេចមកជួបអ្នកនេសាទ
មួយរយៈក្រោយពីលោកយេស៊ូលេចមកជួបពួកសាវ័ក ពេត្រុសបានសម្រេចចិត្តទៅនេសាទត្រីនៅស្រុកកាលីឡេវិញ។ ថូម៉ាស់ យ៉ាកុប យ៉ូហាន និងអ្នកកាន់តាមខ្លះទៀតក៏បានទៅជាមួយនឹងគាត់ដែរ។ ពួកគាត់នេសាទត្រីពេញមួយយប់ តែចាប់មិនបានត្រីសោះ។
លុះព្រលឹមឡើង ពួកគាត់ឃើញបុរសម្នាក់កំពុងឈរនៅឯមាត់ច្រាំង។ បុរសនោះស្រែកសួរពួកគាត់ថា៖ ‹តើអ្នករាល់គ្នាចាប់បានត្រីទេ?›។ ពួកគាត់ឆ្លើយថា៖ ‹ចាប់អត់បានទេ!›។ បុរសនោះប្រាប់ថា៖ «ចូរទម្លាក់អួននៅខាងស្ដាំទូក»។ ពួកគាត់ក៏ធ្វើតាម ហើយចាប់បានត្រីច្រើនសន្ធឹក រហូតដល់មិនអាចទាញអួនឡើងបាន។ ពេលនោះយ៉ូហានដឹងភ្លាមថាជាលោកយេស៊ូ ហើយគាត់ក៏និយាយថា៖ «គឺជាលោកម្ចាស់!»។ ឮដូច្នេះ ពេត្រុសលោតចូលទឹកភ្លាម ហើយហែលទៅច្រាំង។ ពួកអ្នកកាន់តាមឯទៀតក៏បានចែវទូកទៅតាមគាត់ដែរ។
ពេលមកដល់ច្រាំង ពួកគាត់ឃើញមានរងើកធ្យូង ព្រមទាំងមាននំប៉័ងនិងត្រីនៅលើរងើកនោះ។ លោកយេស៊ូប្រាប់ពួកគាត់ឲ្យយកត្រីខ្លះ ដែលទើបតែចាប់បានមកអាំងជាមួយ។ រួចមក លោកមានប្រសាសន៍ថា៖ ‹ចូរមកបរិភោគអាហារព្រឹក›។
ពេលបរិភោគរួច លោកយេស៊ូសួរពេត្រុសថា៖ ‹តើអ្នកស្រឡាញ់ខ្ញុំច្រើនជាងការនេសាទត្រីទេ?›។ ពេត្រុសឆ្លើយថា៖ ‹បាទ លោកម្ចាស់ជ្រាបហើយថាខ្ញុំស្រឡាញ់លោក›។ លោកយេស៊ូប្រាប់ថា៖ ‹ដូច្នេះ ចូរឲ្យចំណីដល់កូនចៀមរបស់ខ្ញុំ›។ លោកយេស៊ូសួរគាត់ម្ដងទៀតថា៖ ‹ពេត្រុស តើអ្នកស្រឡាញ់ខ្ញុំទេ?›។ ពេត្រុសឆ្លើយថា៖ ‹លោកម្ចាស់ជ្រាបហើយថាខ្ញុំស្រឡាញ់លោក›។ លោកយេស៊ូប្រាប់ថា៖ «ចូរឃ្វាលចៀមតូចៗរបស់ខ្ញុំ»។ លោកយេស៊ូបានសួរសំណួរដដែលនេះជាលើកទី៣។ ពេត្រុសឆ្លើយទាំងក្រៀមក្រំថា៖ ‹លោកម្ចាស់ជ្រាបគ្រប់យ៉ាង។ លោកដឹងហើយថាខ្ញុំស្រឡាញ់លោក›។ លោកយេស៊ូមានប្រសាសន៍ថា៖ «ចូរឲ្យចំណីដល់ចៀមតូចៗរបស់ខ្ញុំ»។ បន្ទាប់មក លោកប្រាប់ពេត្រុសថា៖ «ចូរបន្តកាន់តាមខ្ញុំ»។
«លោក[យេស៊ូ]មានប្រសាសន៍ទៅពួកគាត់ថា៖ ‹ចូរមកតាមខ្ញុំចុះ! ហើយខ្ញុំនឹងធ្វើឲ្យអ្នកទៅជាអ្នកនេសាទមនុស្សវិញ›។ ពួកគាត់បានទុកសំណាញ់ចោលភ្លាម ហើយទៅតាមលោក»។—ម៉ាថាយ ៤:១៩, ២០