ဖဲ​ယ့ၣ်ၡူး​လီၣ်ဖျါ​ထီၣ်​အသး​လၢ အ​တၢ်မၢဖိ​တဖၣ်​အမဲာ်​ညါ ဝံၤ​တယံာ်ဘၣ်​န့ၣ် စီၤ​ပ့းတရူး​ဆၢတဲာ်​လီၤအသး​လၢ အ​က​လဲၤ​ဃုအီၣ်​ညၣ်​လၢ ပီၣ်လဲၣ်​ကၤလံၤလါ​အ​ပူၤ​လီၤ. စီၤ​သိၤမါ, စီၤ​ယၤကိာ်, စီၤ​ယိၤဟၣ် ဒီး​ယ့ၣ်ၡူး​အပျဲၢ်​အဘီၣ်​အဂၤ​တနီၤ​န့ၣ် လဲၤပိာ်​ဝဲ​စီၤ​ပ့းတရူး​အခံ​လီၤ. အဝဲသ့ၣ် ဃုအီၣ်​ညၣ်​ဒီတနၤကျၢၤ သနာ်က့ တ​န့ၢ်​နီ​တဘ့ၣ်​ဘၣ်.

လၢခံ​တနံၤ ဖဲ​ဂီၤခီ​န့ၣ် အဝဲသ့ၣ်​ထံၣ်​ပိာ်ခွါ​တဂၤ ဆၢထၢၣ်​လၢ​ထံကၢၢ်နံၤ​လီၤ. ပိာ်ခွါ​တဂၤ​အံၤ ကိးစိ​အဝဲသ့ၣ် ဒီး​တဲဝဲ​လၢ– ‘မ့ၢ်​သု​ဖီၣ်ညၣ်​န့ၢ် တဘ့ၣ်ဘ့ၣ်​ဧါ.’ အဝဲသ့ၣ်​တဲဘၣ်​အီၤ​လၢ ‘တ​န့ၢ်​နီ​တဘ့ၣ်​ဘၣ်.’ ဒီး​ပိာ်ခွါ​တဂၤ​အံၤ တဲဘၣ်​အဝဲသ့ၣ်​လၢ– “တ့ၢ်လီၤ​စၤ​လၢ​ကဘီ​အ​ဃၢၤ စုထွဲ​တခီ” တက့ၢ်. ဖဲ​အဝဲသ့ၣ်​မၤဝဲ​ဒ်​န့ၣ်​အခါ မၤန့ၢ်​ညၣ်​ဒီဒူၣ်​အဃိ ထုးထီၣ်​ဝဲ​စၤ​တ​န့ၢ်​လၢၤဘၣ်. တဘျီဃီ​န့ၣ် စီၤ​ယိၤဟၣ်​သ့ၣ်ညါ​ဝဲ​လၢ ပိာ်ခွါ​တဂၤ​အံၤ မ့ၢ်ဝဲ​ယ့ၣ်ၡူး​န့ၣ်​လီၤ. စီၤ​ယိၤဟၣ်​တဲဝဲ​လၢ– “မ့ၢ်​ကစၢ်​လီၤ.” တဘျီဃီ​န့ၣ် စီၤ​ပ့းတရူး​စံၣ်​လီၤ​လၢ​ထံ​ကျါ ဒီး​လဲၤ​ပီၢ်ဝဲထံ​ဆူ​ထံကၢၢ်နံၤ​လီၤ. မ့မ့ၢ်​ယ့ၣ်ၡူး​အပျဲၢ်​အဘီၣ်​အဂၤ​တဖၣ်​န့ၣ် ပိာ်​ထီၣ်ဝဲ​စီၤ​ပ့းတရူး​အခံ​လၢ​ကဘီ​လီၤ.

ဖဲ​အဝဲသ့ၣ်​က့ၤ​တုၤလၢ ပီၣ်လဲၣ်​ကၢၢ်နံၤ​အခါ အဝဲသ့ၣ်​ထံၣ်ဝဲ​လၢ ပှၤ​ကၣ်​ဝဲ​ကိၣ်​ဒီး​ညၣ် လၢ​မ့ၣ်အူ​အ​ဖီခိၣ်​လီၤ. ဒီး​ယ့ၣ်ၡူး​တဲဘၣ်​အဝဲသ့ၣ်​လၢ ဟဲ​စိာ်​အါထီၣ်​ညၣ်​တနီၤ​လၢ ပှၤ​က​အီၣ်​ဝဲ​အဂီၢ်​တက့ၢ်. ဝံၤဒီး​ယ့ၣ်ၡူး​တဲဝဲ​လၢ– ‘ဟဲ​အီၣ်​သကိး ဂီၤခီ​တၢ်အီၣ်​သၢၣ်.’

 ဖဲ​အဝဲသ့ၣ် အီၣ်​ဂီၤခီ​တၢ်အီၣ်​ဝံၤ​အခါ ယ့ၣ်ၡူး​သံကွၢ်​စီၤ​ပ့းတရူး​လၢ– ‘မ့ၢ်​န​အဲၣ်​ယၤ​အါန့ၢ်ဒံး တၢ်ဖီၣ်​ညၣ်​အ​တၢ်မၤ​န့ၣ်​ဧါ.’ စီၤ​ပ့းတရူး​တဲဝဲ​လၢ– ‘အဲၣ်ဝဲ​သၢၣ်. ကစၢ်​ဧၢ, ယ​အဲၣ်​နၤ​အါန့ၢ်ဒံး တၢ်ဖီၣ်​ညၣ်​အ​တၢ်မၤ​လီၤ.’ ယ့ၣ်ၡူး​တဲဝဲ​လၢ– ‘မ့မ့ၢ်​ဒ်​န့ၣ်​န့ၣ် လုၢ်အီၣ်လုၢ်အီ​ယ​သိဖိ​တဖၣ်​တက့ၢ်.’ ယ့ၣ်ၡူး​သံကွၢ်​က​ဒီး​အီၤ​လၢ– ‘စီၤ​ပ့းတရူး​ဧၢ မ့ၢ်​န​အဲၣ်​ယၤ​ဧါ.’ စီၤ​ပ့းတရူး​တဲဝဲ​လၢ– ‘ကစၢ်​ဧၢ, ယ​အဲၣ်​နၤ န​သ့ၣ်ညါ​လံ​ဧဲၣ်.’ ဒီး​ယ့ၣ်ၡူး​တဲဝဲ​လၢ– “အံးက့ၤ​ကွၢ်က့ၤ​ယ​သိ​တက့ၢ်.” ယ့ၣ်ၡူး​သံကွၢ်​က​ဒီး​အီၤ သၢ​ဘျီတဘျီ ဒ်​အလီၢ်​လီၢ်​လီၤ. အဃိ စီၤ​ပ့းတရူး အသး​ဘၣ်ဒိ​ဒိၣ်မး​ဒီး တဲဝဲ​လၢ– ‘ကစၢ်​ဧၢ, န​သ့ၣ်ညါ​တၢ်​ခဲလၢာ်, ဒီး​န​သ့ၣ်ညါ​လၢ​ယ​အဲၣ်​နၤ​လီၤ.’ ဝံၤဒီး ယ့ၣ်ၡူး​တဲ​က​ဒီး​အီၤ​လၢ– “လုၢ်အီၣ်လုၢ်အီ​ယ​သိ​တက့ၢ်.” ဒီး​လၢခံ ယ့ၣ်ၡူး​တဲဘၣ်​စီၤ​ပ့းတရူး​လၢ– ‘ပိာ်​ယ​ခံ​ထီဘိ​တက့ၢ်.’