Konyima zapa Jesus ga monekerere vapositoli vendi, Peturusa kwa zire a ka tege nomfi mEfuta lyaGalireya. Tomasa naJakopo naJohanesa, nawo tava mu kwama. Masiku nagenye kwa tegere nye kapi va kwete.

Ngurangura, tava mono mugara ana sikama pezenga. Age ta va pura asi: ‘Muna kwata ko mpili mfi zimwe ndi?’ Tava mu limburura asi: “Kutupu!” Ta va tantere asi: “Tegeni ekwe korulyo rowato.” Apa va li tegere, ekwe tali zura nomfi kapi va vhulire kulikoka mo. Johanesa ta dimburura asi mugara ogo, Jesus, ta tanta asi: ‘Anone, Hompa!’ Peturusa makura ta vatukire momema a zoge a ze pezenga. Vakwawo tava mu kwama nowato.

Apa va ka sikire, tava mono nomfi nomungome pomundiro. Jesus ta va tantere va rete nomfi dimwe edi va kwete. Ta va tantere asi: “Wizeni, mu ya lihake.”

 Apa va mene kulihaka, Jesus ta pura Peturusa asi: ‘Wa hara nge kupita omu wa hara kukwata nomfi ndi?’ Age ta mu limburura asi: “Nhi, Hompa, wa diva asi ame na ku hara.” Jesus ta mu tantere asi: “Lisa nonzwigona dange.” Jesus ta pura hena Peturusa asi: “Enye wa hara nge sili? Ta mu limburura asi: ‘Nhi, Hompa, wa diva asi ame na ku hara.’ Jesus ta mu tantere asi: “Kunga nonzwi dange.” Jesus ta mu pura rwautatu. Peturusa makura ta guwu unene. Ta mu tantere asi: ‘Hompa, ove kwa diva nayinye, wa diva hena sa, asi na ku hara.’ Jesus ta mu tantere asi: “Lisa nonzwi dange.” Ta tantere hena Peturusa asi: “Kwama nge!”