Kitatyi pa kupita’po na pāmwekēle Yesu batumibwa, Petelo wāendele kukapoya pa Dijiba dya Ngadilea. Ba Tomase, Yakoba, Yoano, ne bana ba bwanga bakwabo bāenda nandi. Bātele bwanda bufuku bonso ino kutupu kukwata’ko keta nansha kamo.

Ke ku lubanga, bāmona muntu umo wimene ku nkula. Wēbela lubila’mba: ‘Le mubakwata’ko mwita?’ Nabo bāmulondolola’mba: “Aa!” Muntu’wa wēbanena’mba: “Tai bukonde dya ku lundyo lwa bwato.” Abo pa kuta’bo, kwāpya mwita mungi bininge bākomenwa ne kwabwila bukonde mu bwato. Na pano kala, Yoano wājingulula’mba muntu’wa i Yesu, wānena’mba: “I Mfumwetu!” Ponka na ponka, Petelo wēela pa mema, kāsumbe wenda ku nkula. Bana ba bwanga bakwabo bāmulonda lwa bwato.

Abo pa kufika ku nkula, bātana mikate ne twita pa mudilo. Yesu wēbalombola’mba bwejai’po twita tukwabo twa kosha. Kupwa, wēbeta’mba: ‘Iyai mudye.’

 Abo pa kupwa kudya, Yesu wāipangula Petelo amba: ‘Le unsenswe bininge kutabuka buluwe?’ Petelo wānena’mba: ‘En-en, a Mfumwami uyukile’mba kunsenswe.’ Yesu wāmunena’mba: ‘Nanshi disha twami twana twa mikōko.’ Kadi Yesu wāmwipangula monka’mba: ‘A Petelo, lelo unsenswe?’ Petelo wānena’mba: ‘A Mfumwami, uyukile’tu amba kunsenswe.’ Yesu wāmunena’mba: “Kumba yami mikōko myana.” Yesu pa kumwipangula musunsa wa busatu, Petelo wāfītwa bininge. Wāmunena’mba: ‘A Mfumwami, uyukile bintu byonso. Abe mwine uyukile’mba kunsenswe.’ Yesu wānena’mba: “Disha yami mikōko myana.” Kupwa, wāsapwila Petelo amba: “Nonde nyeke.”