Tej tikʼ chʼin ambʼil otoq kubʼ tyekʼin tibʼ Jesús kywitz t-apóstol, xiʼ Pedro jyol pescad toj mar te Galilea. Xiʼ Tomás, Santiago, Juan ex junjuntl t-xnaqʼtzbʼen Jesús tukʼil. Toj tkyaqil qonikʼen e jyon kyiʼj pescad toj aʼ, noqtzun tuʼnj, mintiʼ tzyet jun kyuʼn.

Toj juntl qʼij te prim, xi kykeʼyin jun xinaq waʼl ttzi aʼ. Tzmax ttzi aʼ xi tqanin jlu kye: «¿Atpe pescad ma tzyet kyuʼne?». Atzun kye xi kytzaqʼweʼn: «Mintiʼ». Xi tqʼamaʼn xinaq kye: «Kyqʼonkuxe xyubʼ tuj aʼ ttxlaj bark tuj bʼanqʼabʼaj». Tej otoqxi kux kyqʼoʼn, noj xyubʼ tuʼn pescad ex mintiʼtl bʼant tuʼn tjax kyqʼoʼn toj bark. Noq minabʼen, el tnikʼ Juan tiʼj qa a Jesús aju xinaq lu ex tqʼama: «¡Ate Qajaw lu!». Xi t-xon tibʼ Pedro toj aʼ ex in nadarin tejxi tpon toj juntl plaj ttzi aʼ. Atzun junjuntl t-xnaqʼtzbʼen Jesús i eʼx lepeʼ tiʼj toj bark.

Tej kypon ttzi aʼ, ok kykeʼyin jun qʼaqʼ. Attoq pescad tkubʼ tibʼaj tukʼil  pan. Xi tqʼamaʼn Jesús kye tuʼn ttzaj kyiʼn junjun pescad tiʼjju otoq che tzyet kyuʼn tuʼn kyokx tzqʼajset. Ex xi tqʼamaʼn jlu kye: «Kytzaje waʼl».

Tej kybʼaj waʼn xi tqanin Jesús jlu te Pedro: «¿Maspe kʼujlaʼn qine tuʼna kywitz qeju pescad lu?». Xi ttzaqʼweʼn Pedro: «Kʼujlaʼna wuʼne, Tat; bʼiʼn tuʼna qa kʼujlaʼna wuʼne». Xi tqʼamaʼn Jesús te: «Qʼonxa kywa qe nẍneʼle». Xi tqanin Jesús juntl maj: «Pedro, ¿kʼujlaʼnpe qine tuʼna?». Xi ttzaqʼweʼn Pedro: «Tat, bʼaʼn tuʼna qa kʼujlaʼna wuʼne». Xi tqʼamaʼn Jesús te: «Xqʼuqinka qe nẍneʼle». Ax jlu xi tqanin Jesús te Pedro toj toxin maj. Tzaj tbʼis Pedro ex xi tqʼamaʼn jlu te Jesús: «Tat, kʼujlaʼna wuʼne. Bʼiʼn tuʼna qa kʼujlaʼna wuʼne». Xi tqʼamaʼn Jesús te: «Qʼonxa kywa qe nẍneʼle». Yajxitl xi tqʼamaʼn jlu te: «Kukx lepeʼka wiʼje».