Lino papisile insita kufuma pano Yesu walolekile uku yatumwa, Petulo wasoolwilepo ukuya umu kuuma inswi kuli Yemba wa Galili. Tomasi, Yakobo, Yoani na atumwa yauze nayo kwene yamulondiile. Yezizye ukuuma inswi usiku onsi nomba yatalemile inswi nanti ayonga.

Uwanda uwalondelilepo katondo, yaweni umonsi umwi aimi uku nkumba yakwe yemba. Wayapundilile ati: ‘Uzye kuli inswi ili yonsi ino imuma?’ Yamunenyile iyati: “Awe!” Lyene umonsi wiyo wayanenyile ati: “Sumbilini umukwau ukwi lunji lya wato.” Lino yacisile vivyo, mu mukwau mwali inswi zingi sana icakuti yafizilwe nu kuutintila umu wato. Yoani wizile ailuka ukuti umonsi wiya wali a Yesu nupya walanzile ati: “U Mwene!” Lilyo kwene sile, Petulo watolokile umu manzi aya uku cituntu. Lyene asambi yauze yamulondiile ala yali umu wato.

Lino yafisile ku cituntu, yaweni umoto ala pali ni nswi nu mukate. Yesu wayanenyile ukuti yalundepo inswi na zyuze pali zino zyali pa  moto izyakuti yalye. Lyene Yesu wayanenyile ati: ‘Izini mulye icakulya ca katondo.’

Lino yamazile ukulya, Yesu uzizye Petulo ati: ‘Uzye wantemwa ukucila umulimo uwa kuuma inswi?’ Petulo watile: ‘Ee, Mwene wamanya ukuti nakutemwa.’ Yesu nawe wamunenyile ati: ‘Fwandi waliisya utwana twa mfwele utwane.’ Yesu nupya kwene wamuzizye ati: ‘Petulo, uzye wantemwa?’ Petulo watiile: ‘Mwene wamanya ukuti nakutemwa.’ Yesu wamunenyile ati: “Wacema utwana twa mfwele utwane.” Yesu uzizye Petulo muku wakwe citatu iuzyo ilili limwi kwene. Cii calenzile ukuti Petulo auvwe sana ulanda. Lyene Petulo walanzile ati: “Mwene wamanya ivintu vyonsi, wamanya ukuti nakutemwa.” Yesu nawe wamunenyile ati: “Liisya utwana twa mfwele utwane.” Lyene Yesu wanenyile Petulo ati: “Twalilila ukundondela.”