A Zeezi sẽn vẽneg a meng t’a tʋm-tʋmdbã yã-a wã poore, a Pɩyɛɛr yikame n kẽng Galile mogrẽ wã n na n yõg zĩma. A Toma, a Zak ne a Zã n paas karen-biis a taab n tũ-a. Yʋngã tõre, b pa tol n paam zĩm ye.

Yibeoogã pĩnda, b yãa rao sẽn yas koomã noore. Rao wã tool n sok-b lame yaa: ‘Yãmb paama zĩm bɩ?’ La b leokame tɩ ayo. Tɩ rao wã yeel-b yaa: “Lob-y zĩm-gãmbrã koglgã rɩtgo.” B sɩd lobame, la b paama zĩm wʋsgo, hal n pa tõe n tak n kẽes batayo wã pʋgẽ ye. Zĩig pʋgẽ, a Zã bãngame tɩ rao wã yaa a Zeezi, t’a yeele: “Yaa Zu-soabã!” Tao-tao bala, a Pɩyɛɛr yɩkame n lʋɩ koomẽ wã n dug n tãag koomã noore. Karen-biis a taabã pʋg-a-la ne batayo wã.

 B sẽn ta koomã noore, b yãa bur ne zĩm sẽn dog bugum zugu. A Zeezi yeel-b lame tɩ b yãk zĩmã b sẽn yõgã bilf n wa tɩ b paas n sẽ. Rẽ poore, a yeel-b lame: ‘Wa-y n dɩ-y-yã.’

B sẽn dɩ n sa, a Zeezi soka a Pɩyɛɛr yaa: ‘Fo nonga maam n yɩɩd zĩmã yõgb bɩ?’ T’a Pɩyɛɛr leoke: ‘N-ye, Zu-soaba. Fo miime tɩ m nonga foo.’ A Zeezi yeel-a lame: ‘Bɩ f ges m piisã yelle.’ A le soka a Pɩyɛɛr yaa: ‘Fo nonga maam bɩ?’ T’a Pɩyɛɛr yeele: ‘Zu-soaba, fo miime tɩ m nonga foo.’ La a Zeezi yeel-a lame: “Yɩ mam piisã pe-kɩɩma.” A Zeezi le sok-a-la naoor a tãab-n-soaba. La a Pɩyɛɛr sũurã sãamame, t’a yeele: ‘Zu-soaba, fo mii bũmb fãa. Fo miime tɩ m nonga foo.’ T’a Zeezi yeel-a: “Ges m piisã yelle.” Rẽ poore, a yeela a Pɩyɛɛr yaa: “Kell n tũ maam.”