Tá ni̱ya̱ʼa tiempo ña̱ ki̱ta ta̱ Jesús nu̱ú na̱ apóstolra, ta̱ Pedro ku̱a̱ʼa̱nra tiinra ti̱a̱ká nu̱ú mar Galilea. Ta̱ Tomás, ta̱ Santiago, ta̱ Juan xíʼin inkaka na̱ discípulo ku̱a̱ʼa̱nna xíʼinra. Soo kǒo ti̱a̱ká nítiinna iníísaá ñu̱ú.

Inka ki̱vi̱, tá xi̱ta̱anní, xi̱nina níndichi iin ta̱a yuʼú playa ta ni̱nda̱ka̱tu̱ʼunrana: “¿Á ti̱inndó ti̱a̱ká?”. Na̱kán ni̱ka̱ʼa̱nna: “Kǒorí”. Ta̱yóʼo ni̱ka̱ʼa̱nra xíʼinna: “Chika̱a̱ndó ñunú chí inka ñáʼñu tú barco”. Tá chi̱ka̱a̱naña, iin chu̱túña xíʼin ti̱a̱ká ni va̱ása kivi chika̱a̱naña ini tú barco. Ta̱ Juan nda̱kunira ta̱ Jesús ta ni̱ka̱ʼa̱nra: “Ta̱ Jesús kúúra”. Ta̱ Pedro iin kama sa̱kána xíʼin miíra nu̱ú ti̱kui̱í ta ni̱xa̱a̱ra nda̱a̱ chí yuʼúrá. Inkaka na̱ discípulo ni̱xa̱a̱na sa̱tára xíʼin tú barco.

Tá ni̱xa̱a̱na chí yuʼúrá, xi̱nina xíxi ñuʼu̱. Ndóo ti̱a̱ká xíʼin si̱táva̱ʼa nu̱ú ñuʼu̱. Ta̱ Jesús ni̱ka̱ʼa̱nra xíʼinna ná taxikana ti̱a̱ká ña̱ va̱ʼa keʼérarí kuxuna. Tasaá ni̱ka̱ʼa̱nra xíʼinna: “Naʼandó kuxundó”.

 Tándi̱ʼi xi̱xina, ta̱ Jesús ni̱ka̱ʼa̱nra xíʼin ta̱ Pedro: “¿Á kúni̱kaún xíniún yi̱ʼi̱ nu̱ú ti̱a̱ká yóʼó?”. Ta̱ Pedro ni̱ka̱ʼa̱nra: “Xa̱a̱ xíni̱vaún ña̱ kúni̱i̱ xínii̱ yóʼó”. Ta̱ Jesús nda̱kuiinra: “Tásaá, taxi ña̱ kuxu ndikachi sa̱na̱i̱”. Tuku, ni̱ka̱ʼa̱n ta̱ Jesús: “Pedro ¿á kúni̱ún xíni̱ún yi̱ʼi̱?”. Ta̱ Pedro ni̱ka̱ʼa̱nra: “Táta, xa̱a̱ xíni̱vaún ña̱ kúni̱i̱ xínii̱ yóʼó”. Ta̱ Jesús ni̱ka̱ʼa̱nra: “Kundaa ndikachi válí sa̱na̱i̱”. Tuku ni̱ka̱ʼa̱n ta̱ Jesús xíʼinra. Ta̱ Pedro ni̱kusuchíní-inira ta ni̱ka̱ʼa̱nra: “Táta, ndiʼiña xa̱a̱ xíni̱vaún, xíni̱vaún ña̱ kúni̱ xínii̱ yóʼó”. Ta̱ Jesús ni̱ka̱ʼa̱nra: “Taxi ña̱ kuxu ndikachi sa̱na̱i̱”. Tándi̱ʼi ni̱ka̱ʼa̱nra: “Kǒo sandákoún ña̱ kundiku̱n yi̱ʼi̱”.