Ntsimbu imo tunde ha solokelele Yesu ku vapostolo veni, Petulu ua ile mu ku tela vantsi mu Cisali ca Ngalileya. Tomasi, Tiango, Yoano na vandongesi vakuavo va ile neni. Va tele, vunoni vutsiki vua mutuntu na umo uahi va lavuile.

Lia mukuavo cimenemene, va muene umo yala na mana ku mukulo. Ua va tambakanene ngueni: ‘Mu na lavulako vamo vantsi ni?’ Va mu kumbuluile nguavo: ‘Vahi!’ Kaha yala uaco ua va lekele ngueni: “Tenu vuanda ku mutamba ua cilio ua vuato.” Mu va lingilemo, vuanda vua sulile na vantsi vavengi, ka va hasele ku vu kokela ku ntunda. Ha ntsimbu ize vene, Yoano ua nongonuene ngecize yala uaco nkuma Yesu, kaha ua handekele ngueni: “Ikeye Muangana!” Kaha vuasi-vuasi Petulu ua limbilile mu mema na ku tana na ku ntunda. Vandongesi vakuavo va mu kavele na vuato.

Mu va hetele ku ntunda, va uanene mbolo na vantsi vali ha coto. Kaha Yesu ua va lekele va nehe vantsi vakuavo mu ku oca linga va  vueze ku via-ku-lia. Kaha ua va lekele ngueni: ‘Tuayenu mua ku liaule.’

Mu va manusuile ku liaula, Yesu ua hulile Petulu ngueni: ‘Ua nji lema ku hiana ku tela vantsi ni?’ Petulu ngueni: ‘Eyo, Muangana, u tantekeya ngecize nja ku lema.’ Kaha Yesu ngueni: ‘Lisa vampanga vange.’ Yesu ua mu hulile naua ngueni: ‘Petulu, ua nji lema ni?’ Petulu ngueni: ‘Muangana, u tantekeya ngecize nja ku lema.’ Kaha Yesu ngueni: “Niunga vampanga vange.” Yesu ua mu hulile naua lua mu citatu. Petulu ua vuile mua ku pihia ku mutima, kaha ua handekele ngueni: ‘Muangana u tantekeya viuma viose. U tantekeya ngecize nja ku lema.’ Yesu ngueni: “Lisa vampanga vange.” Kaha ua lekele Petulu ngueni: “Nji kave.”