Teipa kema nopa apóstoles ya kiitstoyaj Jesús, Pedro yajki michtlajtlamato ipan ueyi atl Galilea. Nojkia yajki Tomás, Jacobo (o Santiago), Juan uan sekinok Cristo itokilijkauaj. Maske seyoual tlajtlamajtoyaj, amo kiitskijkej yon se michij.

Ualmostla ika ijnalok, kiitakej se tlakatl moketstoya atenteno, uan kintlajtlanilik: “¿Inkinitskijkej michimej?”. Inijuantij kinankilijkej: “Amo”. Nopa tlakatl kiniljuik: “Xijmajkauakaj inmomatla ika inejmatl akali”. Kema kimajkajkej, nopa matlatl temik ika michimej uan amo ueliyayaj kitlejkoltiaj. Juan nimantsi kiitak nopa tlakatl eliyaya Jesús, uan kiijtok: “Eli toTeko Jesús”. Pedro nimantsi momajkajki atitla uan asito atenteno. Nopa sekinok yajkej atenteno ipan akali.

Kema asitoj atenteno, kiitakej se akajya tlipitstoya, uan kinkakatsouayaya michijmej uan pantsi. Jesús kiniljuik ma kiuikilikaj  sekinok michimej tlen nojkia kinkakatsoskia. Uan teipa kiniljuik: “Xitlakuakij”.

Kema tlankej tlakuaj, Jesús kitlajtlanilik Pedro: “¿Tlauel tinechiknelia na uan amo ni michimej?”. Pedro kinankilik: “Kena. NoTeko, ta tijmati nimitsiknelia”. Jesús kiiljuik: “Uajka, xikintlamaka nopilborregojuaj”. Jesús sampa kitlajtlanilik: “Pedro, ¿tinechiknelia?”. Pedro kinankilik: “NoTeko, ta tijmati nimitsiknelia”. Jesús kiiljuik: “Xikinmokuitlaui nopilborregojuaj”. Jesús ika expa kitlajtlanilik. Uajka Pedro mokuesok uan kinankilik: “NoTeko, ta tijmati nochi tlamantli, uan tijmati nimitsiknelia”. Jesús kiiljuik: “Xikintlamaka nopilborregojuaj”. Uan teipa kiiljuik: “Nojua xinechtokili”.