Satepan ke Jesús monextij ininixpan tatitanilmej, Pedro amichkitskito itech ueyiat tein pouia Galilea. Tomás, Santiago, Juan uan okseki imomachtijkauan Jesús iuan yajkej. Nochi youal tatemojtoyaj, sayoj ke amo teyi kiajsikej.

Mostika tel kualkan, kiitakej se takat ijkatoya atenoj. Yejua kinuejkatajtanij: “¿Nankinajsikej amichimej?”. Yejuan kinankilijkej: “Amo”. Takat kiniluij: “Xiktamotakan nanmomatauj nanmoyekmakopa”. Keman kitamotkej, kinkitskijkej tel miak amichimej uan amo ueliajok kipankixtiayaj matat. Ompa, Juan kimatik ke nejon takat katka Jesús uan kijtoj: “¡Yejua toTekotsin!”. Pedro niman moatamotak uan yajki hasta atenoj. Oksekin kitojtokakej itech barco.

Keman ajsikej atenoj, kiitakej ke taxotatoya. Jesús kipiaya pantsin uan kiteuatstoya amichij. Kiniluij maj kiualkuinij seki amichimej  tein kinkitskijkaj uan no kinteuatsaskia. Uan ompa kiniluij: “Xialmasalokij”.

Keman tamialmasalojkej, Jesús kitajtanij Pedro: “¿Okachi tinechtasojta ke nejin amichimej?”. Pedro kinankilij: “Kemaj, noTekotsin, tejua tikmati ke nimitstasojta”. Jesús kiluij: “Komo ijkon, xikintamaka noichkauan”. Jesús oksepa kitajtanij: “Pedro, ¿tinechtasojta?”. Pedro kinankilij: “NoTekotsin, tejua tikmati ke nimitstasojta”. Jesús kiluij: “Xikinyekpia noichkatsitsin”. Jesús ika expa kitajtanij nejon. Pedro moteltayokoltij uan kinankilij: “NoTekotsin, tejua tikmati nochi. Tikmati ke nimitstasojta”. Jesús kiluij: “Xikintamaka noichkatsitsin”. Uan ompa kiluij: “Xiksentoka xinechtojtoka”.