Oshikando shimwe konima sho Jesus a li i ihololele aayapostoli, Petrus okwa li a tokola a ka yule oohi mEfuta lyaGalilea. Tomas, Jakob, Johannes naalongwa yalwe, oya yi pamwe naye. Uusiku awuhe kaya li ya kwata mo nando osha.

Ongula yesiku lya landula, oya mono omuntu a thikama komunkulo. Oye okwa ti kuyo: ‘Inamu kwata mo nando ohi yimwe?’ Oya ti kuye: “Aawe!” Opo nduno omuntu ngoka okwe ya lombwele a ti: “Umbileni oshiyulitho sheni lwokolulyo lwowato.” Oyo oyu umbile mo oshiyulitho noya nyengwa oku shi hila mo, oshoka oya li ya yula oohi odhindji. Johannes okwe shi dhimbulula mo mbala kutya omulumentu ngoka oJesus, nokwa ti: “Omuwa oye ngo!” Petrus okwa nukile nziya momeya nokwa mbwindi u uka komunkulo. Aalongwa ooyakwawo oye mu landula nowato.

Sho ya thiki komunkulo, oya mono oohi noshikwiila tayi telekwa peziko.  Jesus okwe ya lombwele ya gwedhe po piikulya oohi dhimwe ndhoka ya kwata. Opo nduno okwa ti kuyo: ‘Ileni, tu lyeni oshuumbululwa.’

Konima sho ya mana okulya, Jesus okwa pula Petrus a ti: ‘owu hole ndje tuu shi vulithe pokuyula oohi?’ Petrus okwe mu yamukula a ti: ‘Eeno, Omuwa, owu shi shi kutya ondi ku hole.’ Jesus okwa ti: ‘Ano litha uunzigona wandje.’ Jesus okwa ti kuye olutiyali: ‘Petrus, owu hole ndje?’ Petrus okwa yamukula a ti: ‘Omuwa, owu shi shi kutya ondi ku hole.’ Jesus okwa ti: “Litha oonzi dhandje.” Jesus okwe mu pula ishewe oshikando oshititatu. Petrus okwa yamukula a nika oluhodhi a ti: ‘Omuwa, owa tseya iinima ayihe; owu shi shi kutya ondi ku hole.’ Jesus okwa ti: “Litha oonzi dhandje.” Opo nduno okwa lombwele Petrus a ti: ‘Tsikila okulandula ndje.’