Jesus éí daalʼaadii yichʼįʼ ííshjání íʼdiilyaadóó bikʼijįʼ, Peter éí Sea of Galileegóó łóóʼ hadeeshʼłoh jiniizı̨́ı̨́ʼ. Thomas, James, John, dóó ídahoołʼaahii łaʼ hoł dah diikai. Tłʼééʼ bíighah hadajiiłʼeeł ndi, tʼáadoo łóóʼ łaʼ hadadzistsooz da.

Hayííłką́ągo, diné léiʼ tábąąhgi sizı̨́įgo dajiiłtsą́. Táłkááʼ tséʼnaa nahódééłkid: ‘Łóóʼósh nihee dahólǫ́?’ Ádajiní: ‘Ndagaʼ!’ Áko áhodííniid: “Tsinaaʼeeł binishʼnáájígo łóóʼ bee hahaltsósí taah daałtsóós.” Tʼáá áko ádaʼjiilaa, ńtʼééʼ łóóʼ tʼóó ahayóí biih hadeebįįhgo chʼééh hadadziłtsóós. Jesus ájítʼı̨́ı̨́ lágo John hwééhoosįįd áádóó ání: ‘Éí Bóhólníihii átʼı̨́!’ Peter dóó ídahoołʼaahii Jesus tábąąhgi baa jíkai.

Tábąąhgi jíkaigo, tsííkáaʼgi łóóʼ dóó bááh daaztʼéego ályaa lá. Jesus áhodííniid, łóóʼ hadasoołtsoozígíí łaʼ nídoohjááh, éí bił daʼdiidı̨́ı̨́ł. Áádóó ádaaní: ‘Hágo, kodi daʼohsą́.’

 Daʼjííyą́ą́ʼdóó bikʼijįʼ, Jesus éí Peter áyidííniid: ‘Łóóʼ hahíleehígíísh biláahgo ayóóʼáshííníʼní?’ Peter ání: ‘Aooʼ, Bóhólníihii, ayóóʼánóshʼníigo nił bééhózin.’ Áádóó ánááhodooʼniid: ‘Shidibé yázhí baʼíłtsoʼ.’ Jesus éí Peter nayídééłkid: ‘Daʼ ayóóshʼáshííníʼní?’ Áko ánáábizhdooʼniid: ‘Bóhólníihii, ayóóʼánóshʼníigo nił bééhózin.’ Áádóó ánááhodooʼniid: “Shidibé baa áhólyą́.” Jesus táadi azlı̨́ı̨́ʼ góneʼ ninááhódééłkid. Peter bikʼee hániʼ yiiʼaʼ. Áko ábizhdííniid: ‘Bóhólníihii, tʼáá ałtsoní nił bééhózin, ayóóʼánóshʼníigo nił bééhózin.’ Jesus ánááhodooʼniid: ‘Shidibé yázhí baʼíłtsoʼ.’ Jesus éí Peter áyidííniid: ‘Tʼáá shikééʼ yínááł.’