Omuvo umwe konyima yetyi Jesus avasile ono apostolu, Petulu aende okukafwa ombisi Melunga lio Galileia. Tome na Tiago na João novalongwa ovakuavo avaende na Petulu. Vakalele otyinthiki atyiho melunga opo vafwe ombisi, mahi avahakuate ombisi naike.

Onthiki onkhuavo komuhuka, vamona omulume umwe ukahi koluhimba. Omulume oo eveihana iya evepulu okuti: ‘Muakuata ombisi?’ Avati: “Au!” Omulume oo evepopila okuti: “Yumbei owanda kokulio kuowato.” Etyi vetyilinga, owanda auyula ombisi onyingi iya avehetyivili okuunanena mowato. Liwa-liwa João etyimono okuti omulume oo o Jesus iya apopi okuti: “Ou o Tatekulu!” Liwa-liwa, Petulu ahombokela momeva ayoo alo koluhimba. Ovalongwa ovakuavo avemulandula nowato.

Etyi vehika koluhimba, avavasi ombisi no no mbolo mbayokwa. Jesus evepopila opo vaete onombisi mbumwe ankho vena opo vayawise kuombu ankho ena. Evepopila okuti: ‘Endyuei mulie.’

 Etyi vamana okulia, Jesus apulu Petulu okuti: ‘Unthyole vali tyipona ava?’ Petulu akumbulula okuti: ‘Enga, Tatekulu, ove utyii okuti ndyikuhole.’ Jesus ati: ‘Nthita onondyona mbange.’ Jesus emupulu vali okuti: ‘Petulu, ove unthyole umwe?’ Petulu ati: ‘Tatekulu, ove utyii okuti ndyikuhole.’ Jesus ati: “Nthita oundyona wange.” Jesus emupulu vali otyikando tya tatu. Petulu anumana unene. Ati: ‘Tatekulu, ove ovipuka aviho uvii, utyii nawa okuti ame ndyikuhole.’ Jesus emupopila okuti: “Lisa oundyona wange.” Jesus apopila Petulu okuti: “Tualako okundandula.”