Ọke i Jesu ọ homaphia rẹn inyikọ na hin, Peter no yo kpe irhenrin uvuẹn Urhie i Galilee. Thomas, James, John ọrhẹ inyikọ na erọrọ ni leli rie. Aye i guọlọ irhenrin ọsoso ason ọrana, ọrẹn, aye e mwu erhenrin owuorowu-u.

Igidi urhiọke ẹdẹ ọreva ye, aye ni mẹrẹn ọhworhare owu ro mevi okokọ urhie na. Ọhworhare na nọ kpare unu nọ aye: ‘Are i mwu erhenrin owuorowu?’ Aye ni kpahenrhọ riẹn: “Ẹjo!” Ọhworhare na nọ tare: “Are i doron eriri are rhẹ obọrhe owọ na.” Ọke aye e ghini ru omaran, eriri na no mwu irhenrin buebun te erhirhiẹ aye i vwa sabu lọriẹ ruẹ owọ aye. Ogege, John nọ mẹrẹnvwrurhe taghene ọhworhare na i Jesu, John nọ tare: “Ọnana Ọrovwori na!” Ogege, Peter no pho ruẹ ame na, nọ rhẹnrhẹn riẹ akpa. Inyikọ re hẹrhẹre na, ni ghwa owọ na riẹ akpa.

Ọke aye e te akpa, aye ni mẹrẹn erhenrin ra ha tọn erhanren ọrhẹ ibrẹdi. Jesu nọ ta rẹn aye nẹ aye i ha irhenrin ba erẹ ọye o vwori bi na. Omarana, nọ ta rẹn aye: ‘Are i mọ riẹ emaren.’

 Ọke aye a riẹ emaren hin, Jesu nọ nọ i Peter: ‘Wu vwo ẹguọlọ kpahen mẹ ghwẹ irhenrin ekpe?’ Peter nọ kpahenrhọ riẹn: ‘Ee, Ọrovwori, wu rheri taghene mi vwo ẹguọlọ kpahuọn.’ Jesu nọ tare: ‘Ghẹrẹ emọ igegede mẹ.’ Ọgbọrọrọ, Jesu nọ nọ i Peter: ‘Wu vwo ẹguọlọ kpahen mẹ?’ Peter nọ tare: ‘Ọrovwori, wu rheri taghene mi vwo ẹguọlọ kpahuọn.’ Jesu nọ tare: “Hẹrote igegede ekokamu mẹ.” Jesu nọ nọ riẹn ọgbọresa ye. Peter no mwuomarhọ omamọ. Peter nọ tare: ‘Ọrovwori, wu rhe ekwakwa enana ephian. Wu rheri taghene mi vwo ẹguọlọ kpahuọn.’ Jesu nọ ta riẹn: “Ghẹrẹ emọ igegede mẹ.” Omarana, Jesu nọ ta rẹn i Peter: “Rhe leli mẹ.”