Ag-abayag kayari nen Jesus ya nampanengneng ed saray apostol, linmay Pedro ed Dayat na Galilea pian mansigay. Akilad sikato si Tomas, Santiago, Juan, tan arum nin disipulo. Sanlabi ran nansigay balet anggapoy narel da.

Nen onkakabuasan la, walay anengneng dan laki ya akaalagey ed gilig na dayat. Inmeyag so laki tan tinepetan to ra: ‘Walay narel yo?’ Imbaga ra: “Anggapo!” Imbaga tod sikara: “Ipelag yoy iket ed bandad kawanan na baloto.” Nen impelag day iket da, apano itan na dakdakel ya sira kanian ngalngali agda la naguyor. Abirbir ya tampol nen Juan ya si Jesus imay laki tan imbaga to: “Say Katawan iman!” Tinmaboy ya tampol ed danum si Pedro tan linmangoy paonlad sakbit. Tinmumbok so arum ya disipulo ya akalugan irad baloto.

Nen wala la rad sakbit, anengneng dan walay tinapay tan ikakalot ya sira. Imbaga nen Jesus ya mangala ray pigaran sira ya narel da  pian iyarum ed ikakalot to. Insan imbaga tod sikara: “Gali dia, mangalmusal kayo.”

Kayari dan nan-almusal, tinepetan nen Jesus si Pedro: ‘Mas inarom ak nen say panagsigay?’ Imbaga nen Pedro: ‘On Katawan, antam ya mas inaro ta ka.’ Imbaga nen Jesus: ‘Pakan mo sirin iray kilaw ya karnerok.’ Tinepet lamet nen Jesus: ‘Pedro, inarom ak?’ Imbaga nen Pedro: ‘Katawan, antam ya inaro ta ka.’ Imbaga nen Jesus: ‘Pastolan mo iray angkekelag nin karnerok.’ Insan tinepetan lamet nen Jesus si Pedro no kasin inaro to. Naermenan ya maong si Pedro kanian imbaga to: ‘Katawan, antam ya amin. Antam ya inaro ta ka.’ Imbaga nen Jesus ed si Pedro: ‘Pakan mo ray angkekelag nin karnerok.’ Insan imbaga to ni: “Mantultuloy kan ontumbok ed siak.”