Rahn ekei mwurin Sises eh ketin pwarehng wahnpoaron ko, Piter koasoanehdi me e pahn kohla laid nan Sehd en Kalili. Tomas, Seims, Sohn, oh ekei tohnpadahk ko iangada ih. Pwohngo pwon irail lalaid ahpw sohte koledi mehkot.

Nimensehngie mandahsang rahno, irail kilangada ohl emen me wie kesikesihnen pohn oaroahro. Ohlo eri likwerlahng irail palio pihlo oh nda: ‘Mie mwahmw me kumwail koledi?’ Irail eri sapeng, nda: “Sohte!” Ohlo eri nda: “Kumwail kadaridi uhken ni palimaun en waramwailen.” Ni ar wia met, uhko direkihla mwahmw tohto kahrehda irail sohla kak apihada pohn pwohto. Sohn eri mwadangete kasawihada me ohlo iei Sises oh nda: “Iei Kauno mwo!” Ni ahnsowohte, Piter lusdiong nan pihlo oh papala ni oaroahro. Tohnpadahk teiko ahpw seiseiki kohdo mwuri kisin pwohto.

Ni ahnsou me irail lella ni oaroahro, irail kilangada pilawa oh mwahmw kei me wie kukkuk pohn kisinieio. Sises eri mahsanihong irail ren wahdo  ekei arail mwahmw ko pwehn patehng kanarail mwenge ko. Ih eri mahsanihong irail: ‘Kumwail kohdo oh mwengehn menseng.’

Mwurin arail kanekehla ar mwengehn menseng, Sises mahsanihong Piter: ‘Ke poakohng ie laudsang laid?’ Piter ahpw sapengki: ‘Ei maing, ei Kaun, komw mwahngiher me I poakohng komwi.’ Sises eri mahsanih: ‘Nna kamwenge nei sihmpwul kan.’ Sises pil ketin pwurehng idek: ‘Piter, ke poakohng ie?’ Piter ahpw sapengki: ‘Maing ei Kaun, komw mwahngihier me I poakohng komwi.’ Sises eri mahsanih: “Apwalih nei sihpw kan.” Sises pil ketin pwurehng idek kesilipak. Piter eri nsensuwedkihla. Ih eri nda: ‘Maing ei Kaun, komw mwahngihier soahng koaros. Komw mwahngihier me I poakohng komwi.’ Sises eri mahsanih: “Kamwenge nei sihpw kan.” Ih eri mahsanihong Piter: “Ideidawehn ie.”