Jesús apostolesninman rikhurisqanmanta pisi tiemponman, Pedroqa Galilea qochaman pescaj riporqa. Tomás, Santiago, Juan, waj yachachisqas imataj paywan rerqanku. Paykunaqa tutantinta pescarqanku, nitaj ni ujta japʼerqankuchu.

Qʼayantin paqarintaj qocha kantupi uj runata rikorqanku. Chay runataj nimorqa: “¿Ujllatapis japʼinkichejchu?”, nispa. Paykunataj “mana” nerqanku. Chay runataj nerqa: “Chʼipata canoaj paña ladonman choqaykuychej”, nispa. Choqaykojtinkutaj ashkha pescadosta japʼerqanku, nitaj orqhoyta aterqankuchu. Juantaj Jesús kasqanta reparaspa nerqa: “¡Jaqayqa Señorninchej!”, nispa. Pedrotaj yakuman phinkiykuspa qocha kantukama nadaspa llojserqa. Wakin yachachisqastaj canoapi rerqanku.

Qocha kantupitaj nina brasas patapi pescadota, tʼantatawan rikorqanku. Jesustaj nerqa: “Japʼisqaykichej pescadosmanta  wakinta apamuychej. Chantá jamuychej mikhurikunaykichejpaj”, nispa.

Mikhusqankutawan Jesusqa Pedrota nerqa: “¿Kay pescadosmanta astawanchu munakuwanki?”, nispa. Pedrotaj “arí Señor, yachanki munakususqayta”, nerqa. Jesustaj nerqa: “Corderitosniyta mikhuchipuway”, nispa. Jesusqa tapullarqataj: “¿Munakuwankichu Pedro?”, nispa. Pedrotaj nerqa: “Señor, yachanki munakususqayta”, nispa. Jesustaj nerqa: “Ovejitasniyta michipuway”, nispa. Jesús nillarqataj: “Pedro, ¿munakuwankichu?”, nispa. Pedrotaj Jesús kinsa kutitaña tapusqanmanta llakikuspa nerqa: “Señor, tukuy imata yachanki, munakususqaytapis”, nispa. Jesustaj nerqa: “Ovejitasniyta mikhuchipuway, qhepaytataj jamullaypuni”, nispa.