Punllacuna yalijpica Jesusca apostolcunamanmi ricurirca. Pedroca mar de Galileapimi pescadota japingapaj rishca carca. Chaimanga Tomás, Santiago, Juan, Jesusta shuj catijcunapashmi paihuan rishca carca. Tuta entero chaipi cashpapash ni shuj pescadota na japircachu.

Cayandi tutamandaca shuj jari yacu manñapi shayajujtami ricurca. Chai jarica tapurcami: ¿Pescadota japircanguichichu? nishpa. Paicunaca nircami: Nimata na japi usharcanchica nishpa. Chaimi chai jarica nirca: ‘Canoa ali ladoman linllita shitaichi’ nishpa. Shina shitajpimi ‘linllipi pescadocuna junda cajpi Ilujchitapash na ushanajurca’. Chaita ricushpami Juanga, Jesús cashcata cuenta japishpa nirca: “Apunchi Jesusmari” nishpa. Chaimi Pedroca nadashpa yacu manñaman chayarca. Cutin Jesusta caishuj catijcunaca canoapimi catirca.

Ña yacu manñaman chayashpaca nina jahuapi pescado cusarijujta, tandatapashmi ricurca. Shinallata nircami, canguna japishca huaquin pescadocunatapash yanungapaj apamuichi nishpa. Jipamanga micungapaj shamuichi nircami.

 Ña micushca jipaca Jesusca Pedrotaca tapurcami: ‘Cai pescadocunatapash ¿yalichu juyahuangui?’ nishpa. Pedroca nircami: “Ari, candaca juyanipachami” nishpa. Chaimi Jesús nirca: “Shina cashpaca, ñucapaj huahua llamagucunata michipangui” nishpa. Cutinmi Jesusca tapurca: “¿Ñucataca juyahuanguipachachu?” nishpa. Chaimi Pedroca nirca: “Ari, candaca juyanipachami. Chaitaca canllata yachapanguimi” nishpa. “Shina nijpimi Jesusca: Ñucapaj llamagucunata michipangui nirca”. Jesús quimsa viajecaman Pedrota tapujpimi paica ninanda llaquirishpa nirca: “Canga, tucuitamari yachapangui. Candaca juyanipachami, Apunchi Jesús” nishpa. Chai jipami Jesusca nirca: “Ñucapaj llamagucunata michipangui” nishpa. Jipamanga nircami: “Ñucata catihuailla” nishpa.