Кала прожыля набут время после кода, сар о Иисусо авеля каринг и апостолоря, о Пётро жыля андэ Галилейско моря, кай тэ астарэл мащес. О Фома, о Иаково, о Иоанно и авэр ученикоря жылэ лэ Петроса. Вся и рят вонэ астарэнас мащес, но нисо на астардэ.

Рано тэсара вонэ додиқлэ по бэрэӷо манушэс. Во зацыписайля лэнди: «Тумэ варисо астардэ?» Вонэ ԥэндэ: «Най!» Кодэва мануш ԥэндя: «Зашон и сеть пэ ла лодкати право риг». Вонэ лэс канглэ. Тоди андэ сеть ашэля кадя фартэ бут мащё, кай вонэ нащи сас тэ вилэн. Тоди о Иоанно поля, кай када о Иисусо. Во зацыписайля: «Када о Ӷосподо!» Тоди о Пётро хукля андо паи и ля тэ плавуий каринг о бэрэӷо. Ай кодэла ученикоря плавуисардэ каринг о бэрэӷо пэ лодка.

Кала вонэ сас по бэрэӷо, вонэ додиқлэ марно и мащё, саво гитояспэ пэ яг. О Иисусо мангля лэ учениконэн, кай вонэ тэ анэн набут мащен, савэн вонэ астардэ, и ԥэндя: «Авэн тэ хан».

 Кала вонэ халэ о Иисусо пушля кай о Пётро: «Любис ту ман май фартэ, чем и бути, пэ сави ту астарэс о мащё?» О Пётро ԥэндя: «Да, Ӷосподо, ту ӷанэс, кай мэ тут фартэ любисарав». О Иисусо ԥэндя: «Тоди правар мэрнэ бакрорэн». О Иисусо упалэ пушля: «Пётро, ту любис ман?» О Пётро ԥэндя: «Ӷосподо, ту ӷанэс, кай любисарав». О Иисусо ԥэндя: «Пасысар мэрнэ бакрорэн». О Иисусо трито разо пушэл лэстар пала када. Тоди о Пётро помэкля о муй. Во ԥэндя: «Ӷосподо, ту ӷанэс вся. Ту ӷанэс, кай мэ тут любисарав». О Иисусо ԥэндя: «Правар мэрнэ бакрорэн». Ай инке во ԥэндя: «И англэ жа пала мандэ».