Pakupita midzidzi mingasi pidamala Yezu kuonekera kuna apostolo ace, Pedhru anyerezera kuenda kamedza m’Bara ya Galileya. Tomasi, Tiyago, Juwau na anyakupfundza anango aenda pabodzi na iye. Iwo amedza masiku onsene mbwenye nee aphata cinthu.

Mangwana mwace camacibese, iwo aona mamuna m’bodzi ali dzololo kuntunda wa bara. Iye aacemera mbaabvundza: ‘Mwakwanisa kuphata ntsomba?’ Iwo ampanga: ‘Nkhabe!’ Mamuna unoyu alonga: ‘Ponyani kokota kukhundu yamadyo ya mwadiya.’ Pidamala iwo kucita pyenepi, kokota yadzala na ntsomba kwakuti iwo acimwana kukwewa kokota. Natenepa Juwau adzindikira kuti mamuna unoyu akhali Yezu, mbalonga: ‘Uyu ndi Mbuya!’ Mwakukhonda dembuka, Pedhru anumpha m’mwadiya mbasambirira mpaka kuntunda. Anyakupfundza anango antowerera mpaka kuntunda.

Pidafika iwo kuntunda, aona nkate na ntsomba mbikaotciwa pa moto. Yezu aapanga toera abwerese zingasi mwa ntsomba zawo  toera kuthimizira. Buluka penepo, iye alonga: ‘Bwerani tidye cakudya camacibese.’

Pakumala kudya, Yezu abvundza Pedhru: ‘Usandifuna kakamwe kupiringana ntsomba?’ Pedhru atawira: ‘Inde Mbuya, musadziwa kuti ndisakufunani.’ Yezu ampanga: ‘Dyesa mabira anga.’ Yezu ambvundza pontho kaciwiri: ‘Pedhru, usandifuna?’ Pedhru atawira: ‘Mbuya, imwe musadziwa kuti ndisakufunani.’ Yezu ampanga: ‘Kumbiza mabira anga.’ Yezu ambvundza pontho kacitatu. Pedhru atsukwala kakamwe, mbalonga: ‘Mbuya, imwe musadziwa pyonsene. Musadziwa kuti ndisakufunani.’ Yezu ampanga: ‘Dyesa mabira anga.’ Buluka penepo, apanga Pedhru: ‘Pitiriza kunditowera.’