Ambeni ngoi na peko ti so Jésus asi na abazengele, Pierre amû lege ti gue ti gi susu na yâ ti Ngu ti Galilée. Thomas, Jacques, Jean nga na ambeni disciple ague legeoko na lo. Na bï ni kue ala gi susu me ala wara ye oko ape.

Na ndade ni na yanga ti ndapre, ala bâ mbeni koli so ayeke duti na yanga ti ngu ni. Lo duti na yanga ti ngu ni lo tene na ala, lo tene: ‘Ala wara susu?’ Ala tene: “Ên-ën!” Koli ni atene na ala: “Ala bi gbanda ni na terê ti ngö ni na mbage ti koli, na ala yeke gbu asusu.” Na ngoi so ala sara ni, yâ ti gbanda ti ala akomanse ti si na gbâ ti asusu juska a sara si ala lingbi ti gboto gbanda ni na gigi ape. Droit, Jean aga ti hinga so a yeke Jésus na lo tene: “So Seigneur la!” Pierre angbâ ahuru lo tï na yâ ti ngu lo nagé juska na yanga ti ngu ni. Atanga ti adisciple ni amû peko ti lo na ngö.

 Tongana ala si na yanga ti ngu ni, ala bâ mapa nga na ambeni susu so a ngbâ ti zö ni. Jésus atene na ala ti ga na ambeni susu ti ala ni ti zia na ndö ni. Na pekoni lo tene: ‘Ala ga ala te kobe.’

Tongana ala te kobe ni ahunzi awe, Jésus ahunda Pierre, atene: ‘Eskê mo ye mbi ahon kua ti gbungo susu?’ Pierre atene: ‘En, Seigneur, mo kue mo hinga.’ Jésus atene: ‘Mû kobe na akete taba ti mbi.’ Jésus akiri ahunda lo, atene: ‘Pierre, eskê mo ye mbi?’ Pierre atene: ‘Seigneur, mo kue mo hinga so mbi ye mo.’ Jésus angbâ atene: “Bata akete taba ti mbi.” Jésus akiri ahunda lo ti fani ota ni. Vundu asara Pierre ngangu. Lo tene: ‘Seigneur, mo hinga ye kue. Mo hinga so mbi ye mo.’ Jésus angbâ atene na lo: “Mû kobe na akete taba ti mbi.” Na pekoni lo tene na Pierre, lo tene: “Ngbâ ti mû peko ti mbi.”