E leʻi umi talu ona māeʻa ona faaali atu Iesu i le ʻauaposetolo, ae filifili loa Peteru e alu e fagota i le sami o Kalilaia. Na latou ō faatasi ma Toma, Iakopo, Ioane ma isi soo. Na latou fagogota i le pō atoa ae e leʻi maua se iʻa.

I le taeaopō o le aso na sosoo ai, na latou iloa atu ai se tamāloa o loo tū mai i le matafaga. Na valaau mai le tamāloa iā i latou: ʻNa outou maua ni iʻa?’ Na latou tali atu: “E leai!” Na faapea mai le tamāloa: “Ia lafo le upega i le itu taumatau o le vaa.” Ina ua latou faia lenā mea, ona tumu ai lea o le upega i iʻa e tele, ma ua lē mafai ai ona latou tosoina mai i luga. Na vave ona iloa e Ioane o Iesu le tamāloa lea, ma faapea atu: “O le Alii!” O le taimi lava lenā na oso ai Peteru i le sami ma aau atu i le matafaga, ae mulimuli atu isi soo i le vaa.

Ina ua latou oo i le matafaga, ona latou iloa atu lea o ni falaoa faatasi ma iʻa o loo i luga o se afi ua mālala. Na fai mai Iesu iā i latou e avatu  nisi iʻa na latou mauaina e fai ai la latou mālū taeao. Ona ia faapea atu lea: “Ō mai loa e aai.”

Ina ua uma ona latou aai, ona fesili lea o Iesu iā Peteru: ʻPe e sili lou alofa iā te aʻu nai lo o le faifaiva?’ Na tali mai Peteru: ʻIoe le Alii e, ua e silafia ou te alofa iā te oe.’ Na faapea atu Iesu: “Ia e fafaga i aʻu tamaʻi mamoe.” Na toe fesili Iesu: ʻPeteru, pe e te alofa iā te aʻu?’ Na tali mai Peteru: ʻLe Alii e, ua e silafia ou te alofa iā te oe.’ Na faapea atu Iesu: “Ia e leoleo i aʻu tamaʻi mamoe.” Na toe fesili faatolu atu Iesu, ma na matuā faanoanoa ai Peteru. Na tali mai Peteru: ʻLe Alii e, ua e silafia mea uma. Ua e silafia foʻi ou te alofa iā te oe.’ Na faapea atu Iesu: “Ia fafaga i aʻu tamaʻi mamoe.” Ona ia toe fetalai atu lea iā Peteru: “Ia e mulimuli mai pea iā te aʻu.”