LES 92
Yesus go na den fisiman
Wan pisi ten baka di Yesus go na den apostel fu sori den taki a de na libi, Petrus bosroiti fu go fisi na a Se fu Galilea. Tomas, Yakobus, Yohanes nanga wan tu tra disipel go nanga en. A heri neti den trowe nèt, ma den no fanga noti.
A tra dei den si wan man e tanapu na syoro fruku mamanten. A man bari aksi den: ’Unu feni fisi?’ Den piki en: ’Nôno.’ A man taigi den: ’Trowe a fisinèt na a reti-anusei fu a boto.’ Di den du dati den no ben man hari a nèt kon na ini a boto fu di a ben lai nanga fisi. Wantronso Yohanes frustan taki a man na Yesus èn a taki: ’Na Masra!’ Wantewante Petrus dyompo go na ini a watra, dan a swen go na syoro. Den tra disipel kon nanga a boto.
Di den doro syoro den si brede nanga fisi na tapu wan faya. Yesus taigi den fu tyari wan tu fu den fisi kon di den kisi. Dan a taki: ’Un kon nyan.’
Baka di den kaba nyan, Yesus aksi Petrus: ’Yu lobi mi moro a fisi wroko?’ Petrus piki: ’Iya Masra, yu sabi taki mi lobi yu.’ Yesus taki: ’Gi den pikin skapu fu mi nyanyan.’ Dan Yesus aksi en baka: ’Petrus, yu lobi mi?’ Petrus piki: ’Masra, yu sabi taki mi lobi yu.’ Yesus taki: ’Luku den pikin skapu fu mi.’ Yesus aksi en a srefi sani a di fu dri leisi. Petrus ben sari. A taki: ’Masra yu sabi ala sani. Yu sabi taki mi lobi yu.’ Yesus piki en: ’Gi den pikin skapu fu mi nyanyan.’ Dan a taigi Petrus: ’Tan waka na mi baka.’
’Yesus taigi den: „Un tron bakaman fu mi, dan mi o meki unu tron fisiman di e fanga libisma.” Wantewante den libi den fisinèt èn den go waka na en baka.’—Mateyus 4:19, 20
Kande yu lobi den tori disi tu
YESUS—EN NA A PASI, EN NA SAN TRU, EN NA A LIBI
Den de na a syoro fu a Se fu Galilea
Dri leisi Yesus e memre Petrus fa a kan sori taki a lobi en.
TEKI NA EKSEMPRE FU SMA DI BEN ABI BRIBI
Petrus—A leri fu no frede èn fu no tweifri moro
Tweifri kan pori wi bribi. Ma Petrus no frede èn a no tweifri moro fu waka baka Yesus.
