Su apang i Yesus bọu nẹ̌těngkatodẹ su manga rasule, i Petrus mapulu měnomạ kinạ su Laudẹ̌ Galilea. I Tomas, Yakobus, Yohanes, dingangu pirang katau muritẹ̌ bal᷊inẹ timol᷊e si sie. I sire nẹ̌deạ kinạ su kanandụu hěbị ene katewe tawe nakaěbạ sarang sěmbua.

Dịěllone mal᷊ukadẹ̌, i sire nakasilo sěngkatau esẹ dụdarisị su wiwihu apeng. Tau ene nẹ̌kiwal᷊o si sire, ’Apa i kamene nakaěbạ kinạ?’ I sire nẹ̌bera, ”Tala.” Tau ene nẹ̌bera, ’Pělọ somạ i kamene su sěmběka koanengu sakaeng.’ Su tempong i sire někoạ ene, i sire nakaěbạ kinạ mal᷊awọ hakị u i sire tawe nakawol᷊eng somạ ene sarang sakaeng. I Yohanes apidu nasadarẹ̌ tau esẹ ene kai i Yesus. I sie nẹ̌bera, ”Pai ene kai i Tuang!” I Petrus apidu timumpa bọu sakaeng kụ kimalang sarang apeng. Manga muritẹ̌ bal᷊inẹ nẹ̌tuhụ dingangu sakaeng.

Su tempong seng timul᷊i su apeng, i sire nakasilo kinạ dingangu  borotẹ̌ seng tẹ̌tongkạteng. Yesus něngoro si sire pěnamba kinạ gunang tongkateng. Bọu ene i sie nẹ̌bera, ’Mahịe i kitẹ kumaěng.’

Su apang seng nasueng kaěnge, i Yesus nakiwal᷊o si Petrus, ’I kau limembong makěndagẹ̌ si siạ arau su hal᷊ẹ̌ ini?’ I Petrus simimbahẹ̌, ’I Tuang masingkạ iạ limembong makěndagẹ̌ si Tuang.’ Yesus nẹ̌bera, ’Mạeng kerene, gělịko kaěng su manga dombaku.’ Yesus saụ nẹ̌kiwal᷊o, ’Petrus, apa i kau makěndagẹ̌ si siạ?’ I Petrus simimbahẹ̌, ’I Tuang masingkạ iạ makěndagẹ̌ si Tuang.’ Yesus nẹ̌bera, ”Diagạko manga dombaku dararodọ.” Yesus saụ nẹ̌kiwal᷊o katělung sul᷊ẹe, kụ i Petrus sěbạe nasusah naung. I sie nẹ̌bera, ’Tuang masingkạ kěbị haghi. I Tuang masingkạ iạ makěndagẹ̌ si Tuang.’ Yesus nẹ̌bera, ”Gělịko kaěng su manga dombaku dararodọ.” Bọu ene i Yesus saụ nẹ̌bera, ”Turusẹ̌e tol᷊e si siạ.”