Nanapa-kevetse hagnarato ta Galilia agne ty Petera tafara ty nisehoa i Jesosy tamo o apostolio. Niarake tama’e ty Jakoba, i Jaona naho i Tomasy. Nagnarato iareo tamy i harivay faie tsy nahazo fiagne ndra raike.

Ie nimaraindray bey, le nahatrea lahilahy nitsangagne tamoron- driakey iareo. Nitoka iareo i lahilahỳ tie: ‘Nahazo fiagne vao nareo?’ Namale iareo tie: ‘Aha’a!’ Le hoe i lahilahỳ: ‘Apoho ankavana i lakagney ao i harato’areoy.’ Naho fa nanao izay iareo, le nifeno fiagne i haratoy sady tsy nileo iareo tarihegne. Le avy le nahafantatse ty Jaona tie i Jesosy roa, le hoe reke: ‘I Tompo!’ Naho fa naharey izay ty Petera, le nilagno mbamy i Jesosy mbeo. Nagnorike tamy i lakagney avao i mpianatse ila’e rey.

Naho fa niavy tan-tsisi’ey iareo, le fa nanjò fiagne naho mofo fa  vita tono. Nampindese i Jesosy fiagne iareo hatovogne i fa eoy. Le hoe reke: ‘Avia nareo hihinagne.’

Naho fa nivita ty fihina iareo, le hoe ty Jesosy tamy i Petera: ‘Teà’o mihoatse o fagnaratoagneo vao raho?’ Hoe ty Petera: ‘Eka, Tompo. Fanta’o fa tea azo raho.’ Hoe ty Jesosy: ‘Fahano o anak’agnondrikò.’ Nagnontenea i Jesosy indraike reke tie: ‘O Petera, tea ahy vao iheo?’ Hoe ty Petera: ‘Fanta’o fa tea azo raho.’ Hoe ty Jesosy: “Andrazo o anak’agnondrikò.” Nagnontane aze fagnintelo’e ty Jesosy. Nanahelo ty Petera, le hoe reke: ‘O Tompo, hai’o ze kila raha. Fanta’o fa tea azo raho.’ Hoe ty Jesosy: “Fahano o anak’agnondrikò.” Hoe amy izay reke tamy i Petera: “Oriho avao areke raho.”