Yesu yange ande hen mbaapostoli ayange nga karen yô, Peteru hide yem u za kôron ishu shin Zegemnger u Galilia. Nahan Toma man Yakobu man Yohane man mbahenen mbagenev za vea na. Ve tsa haan ukper tugh kaka, kpa ve kôr kwagh ga.

Sev mbu hiin u wanger yô, ve nenge or tile sha kpetar. Maa nan ta ikyenge nan yila ve, nan pine ér: ‘Ne kôr ishu jee?’ Ve kaa a nan ér: “Ei.” Or la maa kaa a ve ér: ‘Haa nen kper vegher u ken imbusu tsoo i ken yan.’ Mba haan yô, ishu iv ken kper la poo je ve lu fantyô u urugh nyôron a mi shin tso ga. Ica gbe ga yô, Yohane kav er i lu Yesu yô, maa a kaa ér: “Ka Ter je.” Fese je maa Peteru tsue tume shin mnger, ôô uwe due sha tar. Mbahenen mbagenev mbara va shin tso va due.

Mba duen sha tar yô, ve nenge a bredi man ishu sha akausu. Tsô Yesu ôr a ve ér ve dugh ishu igen ve va a mi, a seer sha kwaghyan la. Maa a kaa a ve ér: ‘Va ya nen kwagh.’

 Mba ye kwaghyan la kera yô, Yesu pine Peteru ér: ‘M hemba doon we ishima a ishu nee?’ Peteru kaa ér: “Een, Tere, U fa er U doom yô.” Yesu maa kende kaa a na ér: ‘Koson iyôngo yam.’ Yesu shi pine un ér: ‘M doo u ishima?’ Peteru kaa ér: ‘Tere u fa er u doom ishima yô.’ Yesu shi kaa a na ér: “Kuran aniyôngov Av.” Yesu pinen Peteru mpin ne sha kwa tar yô, ishima vihi Peteru tsung. A kaa ér: ‘Tere u fa akaa cii, u fa er u doom ishima yô.’ Yesu kaa a na ér: “Koson iyôngo yam.” Maa a kaa a Peteru ér: ‘Za hemen u dondon sha a mo.’