Yema tshitshɛ l’ɔkɔngɔ wa Yeso mɛnama le apɔstɔlɔ, Petero akɔshi yɛdikɔ ya ntshɔ dia tonda nse lo Ndjale ka Ngalileya. Tɔma, Jakɔba, Joani ndo ambeki akina wakatshu kaamɛ la nde. Otsho w’otondo vɔ wakayange nse koko vɔ kominda ndooko ɛngɔ.

La pindju ka pɛɛ, vɔ wakɛnyi pami kɛmɔtshi emadi l’okongo. Pami kakɔ akawaelɛ oma la wedi w’ashi ate: ‘Onde hanyondi ndooko ɛngɔ?’ Vɔ wakawotɛ vate: “Ndooko!” Pami kakɔ akate ate: “Nyoke ɔtɛyi lo lonya l’omi la waato.” Lam’akawasale dui sɔ, ɔtɛyi wakalole la nse efula woho wele vɔ kokoka mbodja lo waato. Joani akashihodia mbala kakɔ ɔtɔi dia pami kɛsɔ aki Yeso ko nde akate ate: “Ongo Nkumadiɔndjɔ!” Mbala kakɔ ɔtɔi Petero akambɛ l’ashi ndo akasale osale otsha l’okongo. Ambeki akina wakoyele lo waato.

Lam’akawakome lo dibongo, vɔ wakɛnyi mapa la nse yakandafumbaka. Yeso akawatɛ dia vɔ mbela nse mɔtshi dia ndjokotsha kele wale. Oma laasɔ, nde akate ate: ‘Nyoye ndo nyoyole.’

 L’ɔkɔngɔ wa vɔ nshidiya la ndɛ, Yeso akambola Petero ate: ‘Onde wɛ nangakami oleki munda nse?’ Petero akakadimola ate: ‘Eelo Nkumadiɔndjɔ, wɛ mbeyaka dia dimi kokaka ngandji.’ Yeso akate ate: ‘Leshaka ɛkɔkɔ ami wa totshitshɛ.’ Yeso akawombola nto ate: ‘Petero, onde wɛ mbokakami ngandji?’ Petero akokadimola ate: ‘Nkumadiɔndjɔ, wɛ mbeyaka dia dimi kokaka ngandji.’ Yeso akawotɛ ate: “Lamaka ɛkɔkɔ ami wa totshitshɛ.” Yeso akawombola mbala ka sato. Ko Petero akanyange. Nde akate ate: ‘Nkumadiɔndjɔ, wɛ mbeyaka akambo tshɛ. Wɛ mbeyaka dia dimi kokaka ngandji.’ Yeso akawotɛ ate: “Leshaka ɛkɔkɔ ami wa totshitshɛ.” Ko nde akatɛ Petero ate: “Tetemala ndjelami.”