Иисус элчиннеринге көзүлген соонда, кезек үе эрткенде, Пётр Галилей далайже балыктап чорупкан. Ооң-биле кады Фома, Иаков болгаш өске-даа өөреникчилер чораан. Олар хондур балыктааш, чүнү-даа тудуп чадап каан.

Даңгаар эртен олар эрик кыдыынга бир кижини көрүп кааннар. «Балык туттуңар бе?» — деп, ол кижи алгырган. «Чок» — деп, олар харыылаан. Ынчан ол кижи: «Четкиңерни хемениң оң талазынче октаптыңар» — дээн. Олар киир октапкаш, туттунган балыктың хөйүнден четкизин ушта тыртып чадап кааннар. Ынчан Иоанн ол кижини Иисус деп танып кааш: «Бо дээрге Дээргивис-тир!» — деп алгырыпкан. Пётр сугже шурапкаш, эрикче эштип чеде берген. Артканнары соондан хемелеп чеде бергеннер.

Олар кээрге, Иисус одагда хлеб биле балык быжырып турган. Иисус өөреникчилерин тудуп алган балыындан элээн кашты эккээрин дилээш, чемнениринче чалаан.

 Чемненип алган соонда Иисус Пётрдан айтырган: «Балыктаарындан артык меңээ ынак сен бе?» Пётр харыылаан: «Ийе, Дээрги, билир болгай силер мени силерге ынак деп». Иисус: «Ынчаарга мээң хураганнарымны чемгерип чор» — дээн. Иисус база катап айтырган: «Пётр, сен меңээ ынак сен бе?» «Дээрги, ынак деп билир ийик силер чоп» — деп, Пётр харыылаан. Иисус: «Мээң хойларымны кадарып чор» — дээн. Иисус үшкү удаа ол айтырыын катап салган. Пётр аажок муңгарай бергеш: «Дээрги, мени силерге ынак деп билир ийик силер чоп» — дээн. Иисус: «Мээң хойларымны чемгерип база мени улаштыр эдерип чор» — деп чугаалаан.