Ta patil bael, te kʼalal yakʼoj sbaix ta ilel-a te Jesús ta stojol te jpuk-kʼopetike, te Pedro bajtʼ ta stsakel chay ta mar yuʼun Galilea. Te Tomás, Jacobo, Juan sok yantikxan jnopojeletik bajtʼik sok te Pedro. Sjunal ajkʼabal yakik ta stsakel chay pero maʼyuk la staik jkojtuk.

Ta yan kʼajkʼal, ta sakubel kʼinal, la yilik jtul winik te ay ta stiʼil mar. Teyto jojkʼoybotik-a: “¿Aybal la atsakik te chaye?”. Jich la sutik: “Maʼyuk”. Albotik yuʼun te winike: “Chʼojaik ochel te stsakojibal chay awuʼunik ta swaʼel te barkoe”. Te kʼalal jich la spasike, noj ta chay te stsakojibal chay te ma xjuʼix yuʼunik smoesel ta barko. Ta oranax, te Juan la snaʼbey sba te jaʼ Jesús te winike, jich la yal: “¡Jaʼ te Kajwaltike!”. Te Pedro ta oranax la schʼoj sba ta jaʼ, bajtʼ kʼalalto ta stiʼil te mare. Te yantik jnopojeletik la stʼunik bael ta barko.

Te kʼalal kʼotik ta stiʼil te mare, la yilik te ay tsumbil kʼajkʼ. Sok ay chay ta sba te kʼajkʼe sok ay pan. Te Jesús la skʼantiklanbey te yakuk yichʼik tal  chaʼoxkojtuk chayetik te la stsakik yuʼun ya yakʼik ta kʼajkʼ. Jich albotik yuʼun: “Laʼ weʼanik”.

Te kʼalal laj yoʼtanik ta weʼele, te Jesús la sjojkʼoybey te Pedro: “¿Kʼaxbal jich kʼuxon ta awoʼtan-a te bin-utʼil te chayetik ini?”. Te Pedro jich la sutbey: “Kʼux Kajwal, anaʼoj te kʼuxat ta koʼtane”. Te Jesús la yalbey: “Makʼlinbon te tuminchijetik kuʼune”. Te Jesús la schaʼjojkʼoybey: “Pedro, ¿kʼuxonbal ta awoʼtan?”. Te Pedro la sutbey: “Kʼux Kajwal, anaʼoj te kʼuxat ta koʼtane”. Te Jesús la yalbey: “Kanantaybon te tuminchijetik kuʼune”. Te Jesús la sjojkʼoybey ta yoxebal buelta. Te Pedro bayal la smel yoʼtan, jich la sutbey: “Kajwal, anaʼoj spisil. Anaʼoj te kʼuxat ta koʼtane”. Te Jesús la skʼanbey: “Makʼlinbon te tuminchijetik kuʼune”. Ta patil la yalbey: “Tʼunawon ta spisil-ora”.