XCHANOBIL 92
Laj yakʼ sba ta ilel Jesus ta stojolal jtsakchoyetik
Kʼalal echʼ xa ox kʼuuk sjalil ti laj yakʼ sba ta ilel ta stojolal yajtakboltak li Jesuse. Li Pedroe bat stsak choy ta nab Galilea, vaʼun bat chiʼinatuk yuʼun Tomas, Santiago, Juan xchiʼuk li yan jchankʼopetike. Pe li vaʼ akʼobale mi jkotuk choy la staik ta tsakel.
Kʼalal sakub xa ox osile, te vaʼal laj yilik jun vinik ta tiʼ nab, vaʼun xi jakʼbatike: «¿Mi oy xa la atsakik jkotuk choy?». Pe xi la stakʼike: «Muʼyuk». Vaʼun li vinike xi laj yale: «Jipik yalel li anutiʼik sventa tsakob choy ta jot xokon varko li ta abatsʼikʼobike». Jaʼ yuʼun la sjipik yalel li snutiʼike, vaʼun mu xa xnit lokʼel yuʼunik, yuʼun noj ta epal choy. Vaʼun li Juane jaʼ to laj yil ti jaʼ li Jesuse xchiʼuk xi laj yale: «¡Jaʼ li Kajvaltike!». Jaʼ yuʼun li Pedroe la sjip sba yalel ta anil li ta varkoe xchiʼuk nuxinaj batel yoʼ xbat skʼel li Jesuse. Yan li yan jchankʼopetike ta varko batik ti bu oy li Jesuse.
Kʼalal kʼotik ta tiʼ nabe laj yilik ti tsanbil kʼokʼe. Li ta sba kʼokʼe te kajal choy xchiʼuk pan. Jaʼ yuʼun li Jesuse laj yalanbe ti akʼo xichʼik tal yan choyetik sventa smeltsan stiʼike. Vaʼun li Jesuse xi laj yalbe li yajchankʼoptake: «Laʼ veʼanik».
Kʼalal laj yoʼontonik ta veʼele, xi la sjakʼbe Pedro li Jesuse: «¿Mi akʼanojun tajek ti jaʼ mu sta li choyetik liʼe?». Xi la stakʼ li Pedroe: «Jkʼanojot Kajval, anaʼoj ti jkʼanojote». Xi albat yuʼun li Jesuse: «Makʼlino li jchʼiom chijtake». Xi laj yal yan velta li Jesuse: «Pedro, ¿mi akʼanojun?». Xi la stakʼ li Pedroe: «Jkʼanojot Kajval, anaʼoj ti jkʼanojote». Pe xi albate: «Chabio li kuni chijtake». Kʼalal la sjakʼ ta yoxibal velta li Jesuse, li Pedroe lik yat tajek yoʼonton xchiʼuk xi la stakʼe: «Kajval, anaʼoj skotol li kʼusitike, anaʼoj lek ti jkʼanojote». Xi albat yuʼun li Jesuse: «Makʼlino li kuni chijtake». Xi to laj yalbee: «Tsʼakliun-o batel».
«Vaʼun xi laj yale: ‹Laʼ tsʼakliikun, vaʼun krixchanoetik xa chatsakik kuʼun jech kʼuchaʼal chatsakik choye›. Laj yiktaik ta anil li snutiʼik sventa tsakob choye, vaʼun la stsʼakliik batel» (Mateo 4:19, 20).
Xuʼ van chakʼupin skʼelel xtok liʼe
LI JESUSE: JAʼ LI BEE, JAʼ LI MELELE, JAʼ LI KUXLEJALE
Te oy ta tiʼ Nab Galilea
Oxib velta jakʼbat yuʼun Jesus li Pedro sventa xakʼ ta ilel mi ta melel skʼanoje.
JCHANBETIK LI XCHʼUNEL YOʼONTONIKE
Li Pedroe tsal yuʼun li xiʼele xchiʼuk li sloʼil yoʼontone
Xibal sba kʼusi xuʼ chkʼot ta pasel kʼalal chloʼilaj koʼontontike, yuʼun xuʼ tsots chakʼ yip ta jtojolaltik. Pe li Pedroe tsal yuʼun ti chiʼ xchiʼuk ti xchibet toʼox ta sventa ti jaʼ yajtsʼaklom Cristoe.
