Paglabay hin pipira ka adlaw katapos ni Jesus magpakita ha mga apostol, nagdesisyon hi Pedro nga mangisda ha Dagat han Galilea. Umupod ha iya hira Tomas, Santiago, Juan, ngan pipira pa nga disipulo. Bug-os nga gab-i hira nangisda pero waray hira nadakop.

Han tikaaga na, may nakita hira nga lalaki nga natindog ha baybayon. Samtang nakadto hira ha dagat, an lalaki nagpakiana: ‘May nadakop ba kamo?’ Hira binaton: “Waray!” An lalaki nagsiring: “Itunod an pukot ha too nga dapit han baluto.” Han ginbuhat nira ito, an pukot napuno hin isda ngan waray na nira ito kaaalsa. Dida hito, nakilal-an ni Juan nga hiya hi Jesus, ngan nagsiring: “An Ginoo ito!” Linukso dayon hi Pedro ngan naglangoy pakadto ha baybayon. Sinunod ha iya an iba sakay han baluto.

Pag-abot ha baybayon, may nakita hira nga tinapay ngan hin isda nga iginsusugba. Ginsidngan hira ni Jesus nga magdara hin mga isda para idugang ha ira pamahaw. Tapos, nagsiring hiya: ‘Kadi, pamahaw na kamo.’

 Katapos mamahaw, ginpakianhan ni Jesus hi Pedro: ‘Hinigugma mo ba ako labaw ha pagpangisda?’ Hi Pedro binaton: ‘Oo, Ginoo, maaram ka nga hinigugma ko ikaw.’ Hi Jesus nagsiring: ‘Pakaona an akon nati nga mga karnero.’ Nagpakiana utro hi Jesus: ‘Pedro, hinigugma mo ba ako?’ Hi Pedro binaton: ‘Ginoo, maaram ka nga hinigugma ko ikaw.’ Hi Jesus nagsiring: “Atamana an akon gudtiay nga karnero.” Nagpakiana hi Jesus ha ikatulo nga higayon. Nasubo gud hi Pedro. Hiya nagsiring: ‘Ginoo, maaram ka han ngatanan. Maaram ka nga hinigugma ko ikaw.’ Hi Jesus nagsiring: “Pakaona an akon gudtiay nga karnero.” Tapos, ginsidngan niya hi Pedro: “Padayon nga sunod ha akon.”