Jesosy koa fa baka niboaka tamindro apostoly aby io, nandeha nan̈arato Petera, Tomasy, Jakoba, Jaona ndreky pianatra sasany. Iro nan̈arato firaka andra kiaka, fa tsy nahazo raha.

Maraindrain̈y be, nisy lelahy hitandro tamy sisindrano. Ho Lelahy io: ‘Nahazo loko ma anaro?’ Ho iro: “Tsy nahazo!” Lelahy io nivolan̈a: “Atsipia ankavanan̈a sambo io haratonaro.” Nahazo loko maro iro baka tio, ke kalokalo tsy voapanongandro tan̈aty sambo harato io. Efa hainy Jaona edy fa Jesosy lelahy io. Ho Jaona: “Tompo io!” Direkty Petera nipiky tan̈aty rano, ke nilomon̈o nandeha tantety, fa pianatra hafa ndraiky nan̈araka tamy sambo.

Iro koa fa navy tantety, iro nahita loko ndreky mofo natono tan̈abony motro. Nirahiny Jesosy nangalan̈a loko nazondro in̈y han̈ampian̈a hanin̈y io. Ho Jesosy baka tio: ‘Avia atsika hihina.’

 Iro koa fa baka nihina, Jesosy nan̈ontany Petera: ‘Tianao mandilatra raha aby ty ma zaho?’ Ho Petera: ‘Ia, efa hainao zen̈y Tompoko anao!’ Jesosy nivolan̈a: ‘Amia hanin̈y basy ondrikondrikinaka madiniky aby io.’ Jesosy mbala nan̈ontany ndraiky: ‘Ten̈a tia zaho ma anao Petera?’ Ho Petera: ‘Efa hainao fa zaho tia anao.’ Jesosy nivolan̈a: “Iambesa basy ondrikondrikinaka madiniky aby io.” Nimpody nan̈ontany fan̈intelony ndraiky izy, ke nalahelo mare Petera. Ho Petera: ‘A Tompoko anao, efa hainao fitiavako anao.’ Ho Jesosy: “Amia hanin̈y ondrikondrikinaka madiniky.” Hoizy baka tio tamy Petera: “Man̈araha zaho fo.”