Maʼ úuch u chíikbesuba Jesús tiʼ u apostoloʼobeʼ, Pedroeʼ bin chuk kay tu kʼáaʼnáabil Galilea. Tomás, Santiago, Juan yéetel uláakʼoʼobeʼ binoʼob tu yéetel. Chéen baʼaleʼ buul áakʼab mix baʼal tu chukoʼob.

Le táan u sáastaloʼ tu yiloʼob juntúul máak waʼalakbal tu jáal le kʼáaʼnáaboʼ. Le máakaʼ tu kʼáatajtiʼob: ‹¿Yaan wa kay tsʼoʼok a chukikeʼex?›. Letiʼobeʼ tu núukoʼobtiʼ: ‹Minaʼan›. Le máakoʼ tu yaʼalajtiʼob: ‹Jáaychʼinteʼex u redil a chuk kayeʼex tu x-noʼoj le barcooʼ›. Ka tu beetoʼobeʼ le redoʼ sen chuʼup yéetel yaʼab kayoʼob, le oʼolal maʼ páajchaj u náaksikoʼob teʼ barcooʼ. Teʼ súutukoʼ Juaneʼ tu tsʼáaj cuenta Jesús le máakoʼ, ka tu yaʼalaj: ‹¡Letiʼe Yuumtsiloʼ!›. Pedroeʼ tu píikchʼintuba ichil le jaʼoʼ ka bin tak tu jáal le kʼáaʼnáaboʼ. Le uláakʼ disipuloʼoboʼ binoʼob tu paach yéetel le barcooʼ.

Ka kʼuchoʼob tu jáal le kʼáaʼnáaboʼ tʼabaʼan kʼáakʼiʼ, tsʼaʼan waaj yéetel kayiʼ. Jesuseʼ tu yaʼalaj ka u bisoʼob uláakʼ kayoʼob utiaʼal u kʼáaʼtik. Tsʼoʼoleʼ tu yaʼalajtiʼob: ‹Koʼoteneʼex ukʼul›.

 Ka tsʼoʼok u yukʼloʼobeʼ, Jesuseʼ tu kʼáataj tiʼ Pedro: ‹¿Maas wa a yaabiltmen tiʼ le kayoʼobaʼ?›. Pedroeʼ tu núukajtiʼ: ‹Yuumtsil, techeʼ a wojel in yaabiltmech›. Jesuseʼ tu yaʼalajtiʼ: ‹Tséent in walakʼ tamanoʼob›. Letiʼeʼ tu kaʼa kʼáatajtiʼ: ‹Pedro, ¿a yaabiltmen wa?›. Pedroeʼ tu núukajtiʼ: ‹Beyoʼ Yuumtsil, techeʼ a wojel in yaabiltmech›. Jesuseʼ tu yaʼalajtiʼ: ‹Kanáant in mejen alakʼ tamanoʼob›. Tu yóoxtéen ka kʼáataʼabtiʼ tumen Jesuseʼ, Pedroeʼ yaachaj u yóoleʼ ka tu yaʼalajtiʼ: ‹Yuumtsil, techeʼ a wojel tuláakal; jach a wojel in yaabiltmech›. Jesús túuneʼ tu yaʼalajtiʼ: ‹Tséent in mejen alakʼ tamanoʼob›. Tu tsʼoʼokeʼ tu yaʼalajtiʼ: ‹Maʼ u xuʼulul a taal tin paach›.