I Galilaya, Yecu orwatte ki lulub kore. En omiyo botgi cik ma pire tek mada ni: ‘Wuciti, wucilok jo me rok ducu wek gudok jo ma luba. Wupwonygi jami ducu ma apwonyowu kwede, ci wubatijagi.’ Ka dong en ocikke ni: ‘Wiwu opo ni, abibedo kwedwu kare ducu.’

Pi nino 40 i nge cerre, Yecu obedo ka nyutte bot lulub kore mapol ata i Galilaya ki Jerucalem. En omiyogi pwony ma pigi tego dok otimo tango mapol. I ngeye, Yecu orwatte ki lukwenane pi tyen me agikki i Wi Got Jeituni. En owaco botgi ni: ‘Pe wua ki i Jerucalem. Wukur gin ma Lubanga Won ociko pire.’

Lukwenane pe guniang lokke. Gupenye ni: ‘Ibidoko Kabaka me Icrael i kare man bo?’ Yecu ogamo ni: ‘Kare ma Jehovah omoko pira me doko Kabaka peya oromo. Cokcok-ki wubinongo teko ka cwiny maleng obino i komwu, ci wubibedo lucadenna. Wucit wutit lok me kwena i Jerucalem, Judaya, Camaria, ki i agikki lobo ducu.’

I nge meno, Yecu ocako cito malo i polo ci pol oume woko. Lupwonnyene gubedo ka neno malo, ento en onongo dong ocito woko.

Lupwonnyene gua woko ki i Wi Got Jeituni ka gucito i Jerucalem. Gubedo ka cokke i rum mo ma malo kare ki kare kun gilego kacel. Onongo gitye ka kuro tira mukene ki bot Yecu.