Yesu kɛ e se nyɛɛli ɔmɛ ya kpe ngɛ Galilea. E fã mɛ ke a pee nɔ́ ko nɛ he hia wawɛɛ. E de mɛ ke: ‘Nyɛ ya pee nihi ye kaseli ngɛ mahi tsuo a nɔ. Nyɛɛ tsɔɔ mɛ níhi nɛ i tsɔɔ nyɛ ɔ, nɛ nyɛɛ baptisi mɛ.’ Kɛkɛ nɛ e wo mɛ si ke: ‘Nyɛ hɛ nɛ hi nɔ kaa i kɛ nyɛ maa hi si daa.’

Benɛ a tle Yesu si ɔ, e kaseli lafahi abɔ na lɛ ngɛ Galilea kɛ Yerusalɛm ligbi 40. Ngɛ ligbi 40 ɔ mi ɔ, e tsɔɔ mɛ níhi fuu, nɛ e pee nyakpɛ níhi fuu. E kɛ e bɔfo ɔmɛ kpe ngɛ Oliv Yoku ɔ nɔ. Lɔ ɔ ji nyagbe kpemi nɛ e kɛ mɛ kpe. Yesu de mɛ ke: ‘Nyɛ ko je Yerusalɛm. Nyɛɛ ya nɔ nɛ nyɛɛ mlɛ nɔ́ nɛ Tsɛ ɔ wo si ɔ.’

Yesu bɔfo ɔmɛ nui nɔ́ nɛ e de mɛ ɔ sisi. A bi lɛ ke: ‘Anɛ be nɛ ɔ mi nɛ a maa pee mo Israel Matsɛ ɔ lo?’ Yesu de mɛ ke: ‘Be nɛ Yehowa to kaa ma ye Matsɛ ɔ sui lolo. E be kɛe nɛ mumi klɔuklɔu ɔ maa ba nyɛ nɔ, nɛ nyɛ ma ná he wami, nɛ nyɛ maa ye ye he odase. Nyɛɛ ya nɛ nyɛ ya fiɛɛ ngɛ Yerusalɛm, Yudea, Samaria, kɛ ya su zugba a nyagbe he tɔɔ.’

Lɔ ɔ se ɔ, kaseli ɔmɛ na kaa Yesu bɔni kɔɔhiɔ mi ya mi, nɛ bɔku ko ba ha e nɔ. E kaseli ɔmɛ ngɛ kɔɔhiɔ mi hyɛe kaa a maa na lɛ lo, se e je momo.

E kaseli ɔmɛ je Oliv Yoku ɔ nɔ, nɛ a kpale kɛ ho Yerusalɛm ya. A pɔɔ kpemi ngɛ hiɔwe tsu ko mi nɛ a sɔleɔ, nɛ a hyɛɔ blɔ kaa Yesu ma ha mɛ blɔ tsɔɔmi kpahi.