Yésu a bi boma banigil bé i Galiléa. A ti bo ini oda i mahee, le: ‘Kengana, ni yilha bôt banigil ikété biloñ gwobisôna. Ni niiga bo mam me bi niiga bé, ni sôblege bo.’ Ndi a bôn ki bo le: ‘Ni hôya bañ, me ga ba ni bé hiki ngéda.’

Mukété 40 ma dilo a bi tégbaha hana isi i mbus bitugne gwé, Yésu a bi pémél bibôgôl bi banigil bé i Galiléa ni i Yérusalem. A ti bo biniigana bi mahee, a boñ ki ngandak manyaga. I mbus, Yésu a bomna ni baôma bé inyu ngélé yé i nsôk, i ngii hikôa Ôlivé. A kal bo le: ‘Ni nyodi bañ Yérusalem. Ni kônde bem i jam Tata a bi bôn.’

Baôma ba bi nok bé i jam a bé kal. Ba bat nye le: ‘Baa nano nyen w’a yila Kiñe Israel?’ Yésu a timbhe bo le: ‘Ngéda i yé ngi kola le Yéhôva a téé me Kiñe. Ndék ngéda, ni ga kôs ngui i nlôl ni mbuu mpubi, ni yila bôt bem ba mbôgi. Kena, ni téé likalô i Yérusalem, i Yudéa, i Samaria, yak ni bahoma ba nkoñ isi ba ba yé haa ngandak.’

Ha nyen Yésu a bôdôl bet i ngii, ond i hô nye. Banigil ba bi kida ba nun ngii, ndi Yésu a bé nkenek.

Mbus, banigil ba nyodi hikôa Ôlivé, ba ke i Yérusalem. Ba bééna lem i kodba i tuñ ngii i ndap yada, ba soohege. Ba bé bem le Yésu a ti bo biniigana bipe.