Di Galilea, dilehon Jesus ma parenta tu angka muridna. Ninna ma, ‘Laho ma hamu tu sude bangso. Bahen ma nasida gabe siseanku. Ajari ma nasida songon naung huajarhon tu hamu jala didi hamu ma nasida.’ Didok ma muse, ‘Sai na dongananku do hamu.’

Saleleng 40 ari dung mulak mangolu Jesus, didapothon ibana ma marratus muridna di Galilea dohot di Jerusalem. Dibahen Jesus do angka mukjizat jala diajarhon do tu nasida angka na penting. Na parpudi, pajumpang ma muse Jesus dohot angka muridna di Dolok Jetun. Hea do didok Jesus, ‘Unang tinggalhon hamu Jerusalem. Torus ma paima hamu janji ni Debata.’

Alai ndang diboto angka muridna i dope aha maksud ni Jesus tingki i. Disungkun nasida ma Jesus, ‘Naeng gabe Raja nama ho di Israel?’ Didok Jesus ma, ‘Ndang tingkina dope saonari ahu gabe Raja. Alai satongkin nai, jaloonmu ma tondi parbadia ni Debata. Gabe saksiku ma hamu di Jerusalem, di Judea, dohot di Samaria sahat tu ujung ni portibi on.’

Dung i, naik ma Jesus tu surgo. Ditutupi awan ma ibana. Gabe ndang diida angka muridna i be ibana.

Mulak ma angka murid ni Jesus sian Gunung Jetun i tu Jerusalem. Dung i, jotjot ma nasida marpungu jala rap martangiang di kamar parginjang. Sai dipaima nasida do petunjuk sian Jesus.