ISAMBILILO 93
Yesu Abwelelamo ku Muulu
Yesu akumene na basambi bakwe mu Galili. Abapeele umulimo uwacindama sana, atile: ‘Kabiyeni kalengeni abantu aba mu fyalo fyonse ukuba abasambi. Mulebasambilisha fyonse ifyo namwebele kabili mulebabatisha.’ Lyena abalaile ati: ‘Muleibukisha ukuti, nakulaba na imwe lyonse fye.’
Pa nshiku 40 ukutula ilyo Yesu abuushiwe, alimoneke ku basambi abengi mu Galili na mu Yerusalemu. Alebasambilisha ifintu ifyacindama kabili alecita ne fipesha amano. Lyena pa muku wa kulekeleshako Yesu akumene na batumwa bakwe pa Lupili lwa Miolife. Abebele ati: ‘Mwikafuma mu Yerusalemu. Mukatwalilile ukulolela ifyo Tata amulaya.’
Abasambi bakwe tabaishibe umo ifyo alandile fyalolele. E ico bamwipwishe ati: ‘Bushe nomba mwalaaba Imfumu mu Israele?’ Yesu atile: ‘Inshita tailafika iya kuti Yehova ambike pa Bufumu. Nomba line mukapokelela amaka ya mupashi wa mushilo kabili mukaba inte shandi. Mukashimikile mu Yerusalemu, mu Yudea, mu Samaria na ku ncende ishabela ukutali pano isonde.’
Lyena Yesu atendeke ukuya mu muulu mpaka amakumbi ya mufimba. Abasambi bakwe batwalilile fye ukulolesha mu muulu, lelo alilekele ukumoneka.
Abasambi bafumine pa Lupili lwa Miolife no kuya ku Yerusalemu. Lyonse baleba pamo mu muputule wa pa muulu balepepa. Balelolela ukuti Yesu abebe na fimbi ifya kucita.
“Ne mbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14
Nalimo Kuti Mwatemwako ne fi
YESU E NSHILA, ICINE NO MWEO
Abantu Abengi Bamona Yesu Ilyo Ubushiku bwa Pentekoste Bushilafika
Ilyo Yesu ashilaya ku muulu, pa numa ya kubuuka, alyebele abasambi bakwe pa fyo bali no kupokelela e lyo na pa fyo bali no kufibomfya.
