Jisas i mitim ol man blong hem long Galili, mo i talem wan tok we i impoten tumas long olgeta, i se: ‘Yufala i mas go pulum ol man blong olgeta kantri oli kam disaepol blong mi. Yufala i tijim olgeta olsem we mi mi tijim yufala, mo yufala i baptaesem olgeta.’ Nao hem i mekem wan promes se: ‘Yufala i mas tingbaot se, oltaem bae mi mi stap wetem yufala.’

Long ol 40 dei afta we Jisas i laef bakegen, hem i kamtru long plante handred disaepol long Galili mo Jerusalem. Hem i tijim olgeta long ol impoten save, mo i mekem plante merikel. Nao hem wetem ol aposol oli joen laswan long Hil Blong Ol Oliftri.

Jisas i talem finis long ol aposol se: ‘Yufala i no lego Jerusalem. Yufala i wet blong kasem ol samting we Papa i promes blong givim.’ Be oli no kasem save long tok ya, ale, oli askem se: ‘?Bae yu yu kam King blong Isrel naoia?’ Jisas i ansa se: ‘I no stret taem yet blong Jehova i mekem mi mi kam King. I no longtaem, bae yufala i kasem paoa blong tabu spirit, nao yufala i witnes blong mi. Bae yufala i go prij long Jerusalem, Judia, Sameria, gogo yufala i kasem olgeta ples long wol.’

Ale sloslo, Jisas i go antap long skae mo wan klaod i kam kavremap hem. Ol disaepol oli stap lukluk i go antap, be hem i lus finis.

Nao oli aot long Hil Blong Ol Oliftri, oli gobak long Jerusalem. Oltaem oli stap mekem miting mo prea long wan rum antap. Oli stap wet blong Jisas i talem long olgeta ol samting we oli mas mekem.