Éyoñe Yésus ba beyé’é bé be nga tôban e Galilée, a nga ve be beta abendé nyi: ‘Kelan a bo meyoñe mese beyé’é. Ye’elané be mam mese me nga jô mia, a baptizô be.’ A nga bo fe be ngaka’a nyi: ‘Te mia vuane na, ma ye ke ôsu a tabe a mia.’

Melu mewôm menyin, mvus éyoñe Yésus a nga wômô, a nga yené be mintete beyé’é e Galilée a Jérusalem. A nga ve be beta miñye’elan, a volô fe be na be bo ngule ya bo mesimba. A nga kandane lôt éyoñ a minlômane mié Nkôle Beolivier. A nga jô be na: ‘Te kôlané Jérusalem. Kelané ôsu a yange mam Ésa wom a nga ka’ale mia.’

Minlômane mié mi nji be mi wô’ô mejô a nga jô. Ane be nga sili nye na: ‘Ye ô mbeme bo Njôô ya Israël? Yésus na: ‘Éyoñe Yéhôva a nga tyi’i na ma ye bo Njôô é ngenane te kui. Ana’ana, mia ye bi ngule ya mbamba nsisim, a mia ye bo bengaa bam. Kelané kañete e Jérusalem, e Judée, e Samarie akekui meku’u mese ya si.’

Ane Yésus a nga taté na a bete yôp, akekui minkut mi nga mane yandane nye. Beyé’é bé be mbe be fombô’ô ane a ke, akekui a nga jañe be mis.

Beyé’é be nga kolô Nkôle Beolivier a ke Jérusalem. Be mbe be sula’an éyoñ ése, be ye’elane fe nsamba. Be mbe fe be yange’e na Yésus a ve be memvinda.