Óundaraguati Hesusu hama lani disipulugu lumúanrugu Galiléa. Ru lumuti gumadi wéiriti lisudinin le houn: “Heiba lidan sun fulasu áluaha gürigia lun nánime disipulugu. Sun le narufudahabei hun, arufudaha huméi giñe houn ani badisei humaña”. Ábati füramase lan houn: “Mabulieida huméi anahein lan huma súnwandan”.

Bián-wein weyu lárigiñe láguyugun Hesusu, arufudaguati lungua houn saragu san hádangiñe lani disipulugu dandu Galiléa kei Herusalén. Arufudahati bandi katei súdiniti houn, adüga ligía bandi milaguru. Lárigiñe, aba lóundaragun luagu lagumuhóun wéiyaasu hama lani apostolugu luagu wübü Oliwu. Lariñaga houn: “Máfurida humá Herusaléngiñe, agurabaha huméi le füramase láalibei Núguchi hun”.

Úati meha gunfuranda hamani lani Hesusu apostolugu ka lan labusenrubei lariñagun, ligía hálügüdünbalin: “Bagumesera san arúeiha Ísüraeli?”. Lariñaga houn: “Mabuserungili Heowá nagumeserun arúeiha. Gama lumoun, málühadün eresibira sífiri sandu ani líchuguba erei hun lun gefén humá nuagu. Heiba apurichiha Herusalén, Hudéa, Samaria luma lidan lidise-agei fulasu ubouagu”.

Aba lamudeirun Hesusu sielun, ábati ladouragun aban dúeri lau. Aba herederun lani disipulugu aríagua sielun. Sódini, aba marihin hamaali lan.

Giributiña disipulugu lídangiñe wübü Oliwu uburugun Herusalén. Héchutiña meha óundaragua ñein lidan aban rumu íñugiñe tibiti aban muna lun hafurieidun. Hagurabahaña meha líchugun Hesusu amu burí adundehani houn.