Yesu yaliwana ni tumbaji twenyi mu Ngalileya. Iye yaaha shimbi yilemu ngwo: ‘Yenu nutayise tumbaji aku mavungu eswe. Alongesenu yuma yize hi nanulongesa ni kwaapapachisa.’ Mba hi yaalakenya ngwenyi: ‘Iwulukenu ngwenu, nguli hamwe nenu matangwa eswe.’

Ha matangwa 40 muze te hamuhindwisa, Yesu yasoloka kuli tumbaji twenyi kulakaji mu Ngalileya ni mu Yerusaleme. Yaalongesa yuma yilemu nawa yalinga yikomokeso yinji. Kulutwe Yesu yaliwana chakasula ni apostolo jenyi, ku Mulundu wa Olevwe. Yaamba ngwenyi: ‘Kanda nukatuka mu Yerusaleme. Nungenu ni kushimbwila yize Tata hanalakenya.’

Apostolo jenyi kakanyingikine ulumbunwiso wa yize te anambe. Chocho yamuhula ngwo: ‘Shina haliapwila muopwa Mwanangana mu Izalele?’ Yesu yaamba ngwenyi: ‘Wano hi mashimbu ko waze Yehova hatesa hanga ngupwe Mwanangana.’ Kwasala hakehe, munukatambula ndundo, kupalikila mu spiritu yisandu nawa munukapwa yela jami. Yenu nukambujole mu Yerusaleme, Yundeya, Samaria, ni ku masongo a hashi heswe.’

Chocho, Yesu yaputuka kuya mwilu nawa malelwa yamufuka. Tumbaji twenyi yanunga ni kumutala, chipwe chocho te haya kulu.

Tumbaji yakatuka ku Mulundu wa Olevwe yaya ku Yerusaleme. Kanji-kanji ayo te kakuliwana mu chipatulo cha kwilu nawa te kakulemba. Ayo te kakushimbwila Yesu hanga aehe usongwelo ukwo.