WASE 93
Lesu i Lomalagi o Jisu
Era sota kei Jisu na nona imuri e Kalili. E tukuna vei ira na ivakaro bibi qo: ‘Ni lako moni vakavulici ira na lewe ni veivanua kece ga mera tisaipeli. Vakavulici ira ena ka au vakavulici kemuni kina, ni papitaisotaki ira tale ga.’ E qai yalataka: ‘Ni kua ni guilecava, au na dau tiko vata kei kemuni.’
E rairai o Jisu vei ira na vica vata na drau nona tisaipeli e Kalili kei Jerusalemi ena loma ni 40 na siga. E vakavulici ira ena levu sara na ka bibi, e levu tale ga nona cakamana. Oti e lai sota ena iotioti ni gauna kei ratou na nona yapositolo ena Ulunivanua ni Veiolive. E kaya: ‘Dou kua ni biuti Jerusalemi. Dou waraka tiko ga na ka e yalataka o Tamaqu.’
E sega ni matata vei ratou na yapositolo na ka e tukuna o Jisu. Ratou tarogi koya: ‘Oni na Tui Isireli ena gauna qo?’ E kaya o Jisu: ‘Qo e sega ni gauna e lokuca o Jiova meu Tui kina. Dou na rawata na kaukaua ni yalo tabu, dou na dau tukuni au. Dou lai vunau e Jerusalemi, Jutia, Samaria, kei na veivanua yawa sara kei vuravura.’
Oti e kau cake sara i lomalagi o Jisu ni ratou rai tu na tisaipeli. E qai tabonaki koya na o.
Eratou biuta mai na Ulunivanua ni Veiolive na tisaipeli me ratou lesu i Jerusalemi. Ratou dau soqoni vata ena dua na rumu ni vale e cake me ratou masu. Eratou waraka na veidusimaki i Jisu.
“Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”—Maciu 24:14
Rawa ni o Wilika Tale ga
JISU—NA SALA, NA DINA, NA BULA
Rairai o Jisu ni Bera na Penitiko
Ni vakaturi oti, se bera tale ga ni lako cake i lomalagi, e vakabibitaka vakavica vata o Jisu vei ratou na nona tisaipeli e dua na ka ena soli vei ratou kei na kena ivakavakayagataki.
