Yesu kɛ esɛɛnyiɛlɔi lɛ kpe yɛ Galilea. Efã amɛ ni amɛfee nɔ ko ni he hiaa waa. Ekɛɛ amɛ akɛ: ‘Nyɛyaa nyɛyafea mɛi ni jɛ shikpɔji srɔtoi fɛɛ anɔ lɛ kaselɔi. Nyɛtsɔa amɛ nibii ni mitsɔɔ nyɛ lɛ, ní nyɛbaptisia amɛ.’ Kɛkɛ ni ewo amɛ shi akɛ: ‘Nyɛkaia akɛ mikɛ nyɛ yɛ daa.’

Be ni atee Yesu shi lɛ, eye gbii 40 yɛ shikpɔŋ lɛ nɔ. Yɛ nɛkɛ be nɛɛ mli lɛ, ejie ehe kpo etsɔɔ ekaselɔi ohai abɔ yɛ Galilea kɛ Yerusalem. Etsɔɔ amɛ nibii ni he hiaa, ni efee naakpɛɛ nii srɔtoi pii. Kɛkɛ ni ekɛ ebɔfoi lɛ kpe nɔ ni ji naagbee nɔ yɛ Oliv Gɔŋ lɛ nɔ. Ekɛɛ amɛ akɛ: ‘Nyɛkashia Yerusalem. Nyɛmɛa nɔ ni Tsɛ lɛ ewo shi akɛ ebaahã nyɛ lɛ.’

Bɔfoi lɛ nuuu nɔ hewɔ ni Yesu kɛɛ amɛ nakai lɛ shishi. Amɛbi lɛ akɛ: ‘Ani nɛkɛ be nɛɛ mli obaatsɔ Israel Maŋtsɛ lɛ?’ Ekɛɛ amɛ akɛ: ‘Be shɛko ni Yehowa baawó mi Maŋtsɛ. Etsɛŋ, mumɔ krɔŋkrɔŋ lɛ baaba nyɛnɔ ni nyɛbaaná hewalɛ, ni nyɛbaatsɔmɔ midasefoi. Nyɛyashiɛa yɛ Yerusalem, Yudea, Samaria, kɛ shikpɔŋ lɛ nɔ hei ni yɔɔ shɔŋŋshɔŋŋ lɛ.’

Kɛkɛ ni awó Yesu kɛtee ŋwɛi, ni atatu baha ehe. Ekaselɔi lɛ tee nɔ amɛkwɛ ŋwɛi, shi amɛnaaa lɛ dɔŋŋ.

No sɛɛ lɛ, amɛshi Oliv Gɔŋ lɛ nɔ ni amɛtee Yerusalem. Amɛkpe daa yɛ ŋwɛi asa ko nɔ, ni amɛsɔle. Amɛfee nakai kɛmɛ Yesu koni etsɔɔ amɛ nɔ ni amɛfee.